МЗКЦ працягвае працаваць на расійскі ВПК да 2029 года

Беларускі завод МЗКЦ заключыў кантракт з маскоўскім АТ «Оборонительные системы» на пастаўку 20 шасі МЗКТ-8021-021, а таксама па пяць шасі МЗКТ-8022-021 і МЗКТ-80211-021.

Спецыялізаваныя шасі сямейства МЗКТ-8021/8022 распрацоўваліся для размяшчэння элементаў зенітна-ракетнага комплексу «Печора-2М», а таксама выкарыстоўваліся як платформы для сістэм супрацьпаветранай абароны і радыёлакацыйных станцый.

Тэрмін выканання кантракта вызначаны да 2029 года.Пры гэтым МЗКЦ ужо знаходзіцца пад санкцыямі Еўрасаюза, ЗША, Вялікабрытаніі, Канады і іншых дзяржаў за падтрымку расійскай агрэсіі супраць Украіны. У 2024 годзе прадпрыемства экспартавала ў Расію сотні вагонаў ваеннай тэхнікі а ў 2025-м гэтыя пастаўкі працягнуліся.

Такім чынам, беларускі завод застаецца часткай вытворчай сістэмы, якая забяспечвае расійскі ВПК. Новы кантракт да 2029 года паказвае, што, нягледзячы на міжнародныя санкцыі, Мінск і Масква працягваюць паглыбляць ваенна-прамысловае супрацоўніцтва.