Мемлекет неліктен қайтадан Ұлттық қордан мақсатты трансферт ала бастады?

Үкімет Ұлттық қордан мақсатты трансферттер бөлу тәжірибесіне қайта оралып жатыр. Бір жыл бұрын ғана билік қор қаржысының таусылуын тоқтату үшін бұлай ақша алудан бас тартқан еді. Ал енді мемлекет бұл қаржыны келешек ұрпақтың игілігі үшін өңірлерде «ауқымды құрылыс» жүргізуге бағыттамақшы.

«Власть» редакциясына пікір білдірген экономистер бұл қадамды басқа қаржы көзі сарқылғандықтан амалсыз жасалған шара деп бағалайды. Сондай-ақ олар бұл ақша тек инфрақұрылымға жұмсалмай, басқа жаққа кете ме, әрі оның қайда жұмсалғаны шетелден қарыз алғаннан қарағанда ашық көрінбей қала ма деп алаңдайды.

Ал ең бастысы, бұл шешім бюджетті тағы да мұнайға тәуелді етеді. Бұл үкіметтің мақсаттарына толық қайшы келеді.