Бүгүн Сахабыт сирин араадьыйата аан бастаан эпииргэ тахсыбыта 95 сыллаах үбүлүөйүнэн Ньурбатааҕы судаарыстыбаннай көһө сылдьар драматическай тыйаатыр кэлэктиибин аатыттан араадьыйа бары үлэһиттэрин, бэтэрээннэрин итиитик-истиҥник эҕэрдэлиибит! Эһиэхэ кытаанах доруобуйаны, этэҥҥэ буолууну, дьолу-соргуну уонна айар үлэҕитигэр ситиһиилэри баҕарабыт!
Ньурба тыйаатырын айар суолугар улахан кылаатын киллэрбит киһинэн саха араадьыйатыгар бэриниилээхтик үлэлээбит суруналыыс, "Золотой микрофон", Николай Кондаков аатынан бириэмийэлэр лауреаттара Анастасия Николаевна Амбросьева буолар. Ньурба тыйаатырын уус-уран салайааччыта, СӨ ускуустубатын үтүөлээх диэйэтэлэ Юрий Макаров: “Ньурбаттан төрүттээх Анастасия Николаевна тыйаатыры кытта сибээһэ, арааһа, тыйаатыр “оҕотун”, дьүөгэтин Наталья Петровна Николаева нөҥүө саҕаланнаҕа буолуо диэн сабаҕалыыбын. Бастаан Анастасия Николаевна араадьыйаҕа атын эйгэни сырдатар этэ онтон сыыйа тыйаатыр, култуура туһунан биэриилэри оҥорор буолбута. 1993 сыллаахха Ньурба тыйаатырыгар «Сатаны» тэрийиэхпититтэн, Анастасия Николаевна бу бэстибээли, биһиги артыыстарбытын, испэктээктэрбитин өрөспүүбүлүкэбит араадьыйатыгар элбэхтэ кэпсээбитэ, уочарка оҥорон иһитиннэрбитэ, биһиги үлэбитин киэҥ араҥаҕа таһаарбыта. Ньурба тыйаатыра атын куораттарга бэстибээллэргэ кыттарыгар Анастасия Амбросьева араадьыйа суруналыыһын быһыытынан хаста да барса сылдьыбыта. Кини кыра уола, билигин биллэр режиссер, сценарист Алексей Амбросьев – Чоох Мунду Ньурба тыйаатырыгар 2012-2014 сылларга режиссерунан үлэлээбитэ, хас даҕаны испэктээги көрөөччү дьүүлүгэр таһаарбыта. Ийэлэрин сырдык аатын үйэтитэн, уолаттара кэнники ыытыллыбыт «Сата» бэстибээллэргэ Анастасия Амбросьева аатынан анал бирииһи тыйаатыры сырдатар суруналыыстарга туттараллар. Анастасия Николаевнаны кытта алтыспыттар, бииргэ үлэлэспит дьон Ньурба тыйаатырын үлэтигэр Анастасия Амбросьева тугунан да кэмнэммэт кылаатын киллэрбитэ диэн куруук махтана саныыбыт. ”