⚽️ SUPERLIGA: BUGUN FARG‘ONA DERBISI, ZOMINDAGI TO‘QNASHUV VA OCHKO UCHUN KURASH KUTMOQDA

Bugun, 16-oktabr kuni futbol bo‘yicha O‘zbekiston Superligasining 24-tur uchrashuvlari davom ettiriladi. Kun dasturidan uchta bahs o‘rin olgan. Ularning barchasi Toshkent vaqti bilan soat 19:00 da boshlanadi.

Chempionlik uchun kurashayotgan «Neftchi» Qo‘qonda maydonga tushsa, turnir jadvalining quyi qismida borayotgan «Bunyodkor» va «Xorazm» uchun ham bugungi uchrashuvlar muhim ahamiyat kasb etadi.

🟡 SURXON — XORAZM🟡 : TURNIR JADVALIDAGI QO‘SHNILAR TO‘QNASHUVI

🏟 OKMK sport majmuasi, Olmaliq
⏰ 19:00
👨‍⚖️ Bosh hakam: Umidjon Rahimjonov

24-tur doirasidagi qiziqarli uchrashuvlardan biri «Surxon» va «Xorazm» jamoalari o‘rtasida kechadi.

23 ta uchrashuvdan so‘ng 27 ochko jamg‘argan termizliklar turnir jadvalining 12-pog‘onasida bormoqda. «Xorazm» esa 22 ochko bilan 15-o‘rinni egallab turibdi.

Jamoalarning birinchi davradagi o‘zaro bahsida «Xorazm» o‘z maydonida 1:0 hisobida g‘alaba qozongan edi. Shu bois «Surxon» uchun bugungi uchrashuv nafaqat muhim ochkolarni qo‘lga kiritish, balki avvalgi mag‘lubiyat uchun revansh olish imkoniyati hamdir.

Orif Onorov emas, asosiy jamoa murabbiylar shtabi boshqaruvidagi termizliklar so‘nggi turda «Qizilqum» bilan golsiz durang qayd etgan. «Xorazm» esa avvalgi uchrashuvida chempionlik uchun kurashayotgan «Neftchi» bilan 2:2 hisobida durang o‘ynagan.

Bugungi bahsda mezbonlarning g‘alabasi ularni turnir jadvalining yuqoriroq pog‘onalariga yaqinlashtirishi mumkin. Mehmonlar esa quyi o‘rinlardan uzoqlashish uchun kurash olib boradi.

🔵 QO‘QON-1912 — NEFTCHI🟢 : FARG‘ONA DERBISIDA CHEMPIONLIK POYGASI

🏟 Markaziy stadion, Qo‘qon
⏰ 19:00
👨‍⚖️ Bosh hakam: G‘ayrat Jo‘rayev

Turning markaziy uchrashuvlaridan biri Qo‘qonda bo‘lib o‘tadi. Farg‘ona viloyatining ikki vakili — «Qo‘qon-1912» va «Neftchi» o‘zaro bahs olib boradi.

23 ta uchrashuvdan so‘ng 52 ochko jamg‘argan «Neftchi» turnir jadvalida ikkinchi o‘rinda bormoqda. Farg‘onaliklar peshqadam «Paxtakor» bilan bir xil ochkoga ega bo‘lib, faqat qo‘shimcha ko‘rsatkichlar bo‘yicha ortda qolmoqda.

«Qo‘qon-1912» esa 23 ochko bilan 13-pog‘onani egallab turibdi. Mezbonlar uchun ushbu bahs quyi o‘rinlardan uzoqlashish yo‘lida muhim sinov bo‘ladi.

«Neftchi» avvalgi turda «Xorazm» bilan 2:2 hisobida durang qayd etib, chempionlik poygasida qimmatli ochkolarni boy bergan edi. Shu sababli farg‘onaliklar bugungi derbida faqat g‘alabani ko‘zlashi tabiiy.

Qo‘qonliklar esa o‘z muxlislari qarshisida chempionlikka da’vogardan ochko tortib olishga intiladi. Viloyat derbisiga xos raqobat va jamoalarning turnir jadvalidagi vaziyati uchrashuvning ahamiyatini yanada oshiradi.

🔵BUNYODKOR — SO‘G‘DIYONA⚪️ : ZOMINDA MUHIM BAHS

🏟 Zomin stadioni, Jizzax viloyati
⏰ 19:00
👨‍⚖️ Bosh hakam: Nayim Qosimov

Bugungi turning yana bir uchrashuvida Toshkentning «Bunyodkor» klubi Jizzaxning «So‘g‘diyona» jamoasiga qarshi maydonga tushadi.

«Bunyodkor» stadioni chim qoplamasidagi muammolar sabab uchrashuvni poytaxtda emas, Zominda o‘tkazishga qaror qilingan.

23 turdan so‘ng «So‘g‘diyona» 28 ochko bilan 11-o‘rinni egallab turibdi. «Bunyodkor» esa 22 ochko jamg‘argan holda 14-pog‘onada joylashgan.

Har ikki jamoa uchun ham uch ochko katta ahamiyatga ega. «Bunyodkor» quyi pog‘onalardan ko‘tarilishga intilsa, jizzaxliklar turnir jadvalining o‘rta qismidagi mavqeini yaxshilashni maqsad qilgan.

Mezbonlarning o‘z odatiy stadionida o‘ynamasligi va «So‘g‘diyona»ning Jizzax viloyatida maydonga tushishi ushbu bahsga qo‘shimcha qiziqish uyg‘otmoqda.

🏦O‘zbek va jahon sportiga oid eng so‘nggi yangiliklar: @Uzasport