Odil Ahmedov: Rossiya bilan kelishuvga yaqin turibmiz

O‘zbekiston milliy terma jamoasi noyabr oyidagi FIFA kunlarida Rossiya termasiga qarshi o‘rtoqlik uchrashuvi o‘tkazishi ehtimoli bor.

O‘zbekiston futbol assotsiatsiyasi vitse-prezidenti Odil Ahmedovning ma’lum qilishicha, tomonlar bu borada muzokaralarni davom ettirmoqda va kelishuvga yaqinlashgan.

Rossiya bilan muzokaralar davom etmoqda

Ahmedov O‘zbekiston tomoni Rossiya futbol ittifoqi bilan yozdan buyon aloqada ekanini va o‘rtoqlik uchrashuvini tashkil etish masalasi bir necha oydan beri muhokama qilinayotganini bildirdi.

«Rossiya tomoni bilan aloqadamiz. Noyabr oyida ikki terma jamoa o‘rtasida uchrashuv tashkil etish bo‘yicha kelishuvga yaqin turibmiz. Hozir barcha tafsilotlar muhokama qilinmoqda», dedi O‘FA vitse-prezidenti.

Ikkinchi variant — Saudiya Arabistoni

O‘zbekiston terma jamoasi noyabr oyida Saudiya Arabistoniga qarshi ham maydonga tushishi mumkin.

Dastlab ushbu uchrashuvni Ar-Riyodda o‘tkazish rejalashtirilgan. Biroq O‘zbekiston tomoni bahsni Toshkentga ko‘chirish taklifini ilgari surgan.

«Hozir Rossiya va Saudiya Arabistoni bilan muzokara olib boryapmiz. Saudiya Arabistoniga qarshi uchrashuv dastlab Ar-Riyodda o‘tkazilishi kerak edi. Biz esa xavfsizlik masalasini hisobga olib, bahsni Toshkentda tashkil etishni taklif qildik. Hozircha Saudiya tomoni bunga rozilik bermadi», dedi Ahmedov.

Uchrashuv qayerda o‘tishi ham ochiq masala

Agar Saudiya Arabistoni bilan kelishuvga erishilmasa, O‘zbekistonning asosiy variantlaridan biri Rossiya terma jamoasi bo‘lib qoladi.

Biroq bu uchrashuvning qayerda tashkil etilishi bo‘yicha ham hozircha yakuniy qaror yo‘q.

«Agar Saudiya Arabistoni bilan kelisha olmasak, Rossiya bilan o‘ynash ehtimoli yuqori. Biz uchrashuvni Toshkentda o‘tkazishni istaymiz, Rossiya tomoni esa o‘z maydonida o‘ynashga qiziqmoqda. Shu sababli bu masala ham hali hal qilinmagan», dedi u.

Yakuniy qaror Kannavaro bilan muhokama qilinadi

Ahmedovning ta’kidlashicha, noyabr oyidagi o‘rtoqlik uchrashuvi bo‘yicha yakuniy qaror milliy terma jamoa bosh murabbiyi Fabio Kannavaro bilan maslahatlashgan holda qabul qilinadi.

«Hozircha yakuniy kelishuv mavjud emas. Barcha tafsilotlarni Fabio Kannavaro bilan ham muhokama qilishimiz kerak. Umid qilamizki, noyabr oyida kuchli raqiblardan biriga qarshi uchrashuv o‘tkaza olamiz», dedi Odil Ahmedov.

O‘zbekiston terma jamoasi so‘nggi o‘rtoqlik uchrashuvlarida Eronni 3:1, Suriyani 4:1 hisobida mag‘lub etdi. Janubiy Koreyaga qarshi bahs esa 0:2 hisobidagi mag‘lubiyat bilan yakunlandi.

🏦O‘zbek va jahon sportiga oid eng so‘nggi yangiliklar: @Uzasport