🇦🇿 27 sentyabr

Bu tarix bizim üçün təqvimdə adi bir gün deyil. Müharibədən illər keçə bilər. Amma müharibə insanın içində elə asanlıqla keçib getmir.

Heç bir səbəb olmadan o günləri xatırlayırsan. Kiminsə son dəfə necə güldüyünü, kiminsə son dəfə nə dediyini xatırlayırsan.
Bir neçə dəqiqə əvvəl səninlə danışan adamın bir anda susduğunu görürsən. O zaman anlayırsan ki, həyat əslində nə qədər incə bir xəttin üzərində dayanır. O günlərdə heç kim qəhrəman olmaq haqqında düşünmürdü. Heç kim özünü tarix kitablarına yazdırmaq üçün döyüşmürdü. İgidlərin yalnız bir amalı vardı.

Vətən xəritədə çəkilmiş sərhəd deyil. Vətən ananın səsidir. Atanın qapıda gözləməsidir. Uşağın atasının yolunu gözləməsidir. Evə qayıdanda içəcəyin bir stəkan çayın, küçənin, doğma torpağın, illərdir görmədiyin dağın, kəndin, şəhərin qoxusudur. Bir sözlə Vətən səni sən edən mənliyin, şərəfin və sahib olduğun hər şeyindir!

Biz bu gün 27 sentyabrda ilk növbədə şəhidlərimizi xatırlayırıq. Onların adlarını sadəcə siyahılarda görmək istəmirik. Çünki onların hər birinin bir həyatı vardı. Bir ailəsi vardı. Dostları vardı. Sevdiyi insan vardı. Planları vardı. Bəlkə sabah üçün aldığı bir şey vardı. Bəlkə qayıdanda edəcəyi bir zarafat vardı. Bəlkə kiməsə “gələndə danışarıq” demişdi. Amma bəzi “sonra”lar heç vaxt gəlmədi.

Bu səbəbdən 27 sentyabr mənim üçün yalnız müharibənin başladığı gün deyil. Bu, bizə bir həqiqəti xatırladan gündür. İllərdir azadlığa səsləyən Vətən naləsinə cavab verib, 44 günə əbədi son qoyduğumuz gündür.

Bir daha anlayıram ki, şəhidlərin bizdən istədiyi ən böyük şey yalnız onları xatırlamaq deyil. Onların qoruduğu dəyərləri qorumaqdır. Bir-birimizə sahib çıxmaqdır. Vətəni yalnız sözlə deyil, davranışımızla sevməkdir. Ədalətli olmaqdır. Vicdanlı olmaqdır. Bu torpağın gələcəyini qorumaqdır.

Çünki şəhidlərin xatirəsinə ən böyük hörmət hər il bir gün yas saxlamaq yox, onların uğrunda həyat verdiyi sabahı layiqincə yaşatmaqdır.

Bəziləri qayıtdı. Bəziləri isə yox. Buna görə də bu gün nəfəs aldığımız hər saniyənin, azad gəzdiyimiz hər küçənin, doğma torpağa basdığımız hər addımın qiymətini bilməliyik.

Şəhidlərimizin ruhu qarşısında baş əyirik. Allah bütün şəhidlərimizə rəhmət eləsin.

Vətən sağ olsun.

🇦🇿 @UDudaka