Kumushkonda “Go‘ro‘g‘li dostoni avlodlar ovozida” baxshichilik kechasi yakunlandi
Parkent tumanining Kumushkon hududida ikki kun davom etgan “Go‘ro‘g‘li dostoni avlodlar ovozida” baxshichilik kechasi yakunlandi.
Respublikamizning turli hududlaridan kelgan ijrochi yoshlar va sanʼat ustalari ishtirokidagi tadbirda xalq og‘zaki ijodining nodir namunalari yangrab, baxshichilik san’atining o‘ziga xos an’analari va ijro mahorati namoyon etildi.
Kechaning ikkinchi kunida baxshilar o‘zaro bellashib, tomoshabinlarga unutilmas taassurot ulashdilar.
Yakunda g‘olib va sovrindorlar eʼtirof etildi.
Xususan, bellashuvlarda surxon baxshisi Ziyodulla Ahmedov 1-o‘rin, xorazmlik Rasul baxshi Abdurahmonov 2-o‘rin, Qoraqalpog‘iston Respublikasidan ishtirok etgan Uldaulet Sarsenbayeva esa 3-o‘rinni egalladi.
G‘olib va sovrindorlar pul mukofotlari, diplom va esdalik sovg‘alari bilan mukofotlandi.
Shuningdek, turli nominatsiyalar bo‘yicha ishtirokchilar Toshkent viloyati hokimligi tomonidan taqdirlandilar.
Mazkur baxshichilik kechasi milliy san’atimizni keng targ‘ib etish, xalq dostonchiligini asrab-avaylash va uning boy an’analarini kelgusi avlodlarga yetkazishda muhim ahamiyat kasb etadi.
✅Telegram 🌐Website 📹YouTube✅Facebook 🕊Twitter🌐Instagram