Сёння з намі звязалася беларуская валанцёрка Алена Жаркевіч — прадстаўніца валанцёрскага цэнтра «Сустрэча» і «Беларускага аўтаполку» — з прапановай правесці Кангрэс беларусаў Украіны.

Ідэя — правесці яго ўжо ў новым фармаце: сабраць беларусаў, якія жывуць і дзейнічаюць ва Украіне, а таксама запрасіць прадстаўнікоў украінскай улады, журналістаў і нашых партнёраў.

Мы ўжо праводзілі першы Кангрэс беларусаў Украіны. Тады за адным сталом сабраліся беларусы, якія жывуць ва Украіне, беларускія добраахвотнікі і ветэраны.

Гэта быў важны досвед. Мы паказалі, што беларусы Украіны здольныя сесці за адзін стол, размаўляць паміж сабой, чуць розныя пазіцыі і, нягледзячы на адрозненні, знаходзіць агульныя рашэнні.

Сёння ёсць неабходнасць зрабіць наступны крок.

Беларуская супольнасць ва Украіне — гэта не толькі людзі, якім патрэбная дапамога. Гэта людзі, якія з 2014 года дапамагаюць Украіне, ваююць у складзе ўкраінскіх падраздзяленняў, займаюцца валанцёрствам, ратуюць людзей, развіваюць беларускую культуру, прадстаўляюць Беларусь і будуюць сваё жыццё ва Украіне.

Таму нам патрэбная не толькі размова паміж беларусамі, але і адкрыты дыялог беларусаў з украінскай дзяржавай і ўкраінскім грамадствам.

У беларусаў, якія жывуць і дзейнічаюць ва Украіне, сёння назапасілася шмат пытанняў — прававых, сацыяльных, арганізацыйных, культурных і бяспекавых. Ёсць праблемы, якія немагчыма вырашыць паасобку. Іх неабходна абмяркоўваць разам і выпрацоўваць агульныя падыходы.

Для гэтага ёсць і адпаведнае месца — Дом у Бабулі ў Кіеве, на беразе Дняпра.

Мы падтрымліваем гэтую ініцыятыву. Больш за тое, наша арганізацыя гатовая выступіць суарганізатарам Кангрэса і далучыцца да яго падрыхтоўкі.

Важна, каб гэты Кангрэс стаў не фармальным мерапрыемствам дзеля чарговых фотаздымкаў, а рэальнай пляцоўкай для размовы, дзе беларусы Украіны змогуць самі агучыць свае праблемы, прапановы і бачанне будучыні.

Адкрытыя да абмеркавання даты, фармату і парадку дня.

У адзінстве — наша сіла!
Жыве Беларусь!
Слава Украіне!