«Да мяне без аніякіх тлумачэньняў не патрапіў адзін зь лістоў Дзяніса яшчэ за верасень» — жонка палітвязня Дзяніса Івашына распавяла пра стан мужа

Дзяніс Івашын — беларускі патрыёт, журналіст, валанцёр беларускай версіі сайта міжнароднай раследвальнай супольнасці InformNapalm з 2014 года. Вядомы сваім раследаванням пра ўплыў "русского мира" на Беларусь і Сірыю, пра скандальную забудову ў Курапатах, а таксама пра пераход былых украінскіх беркутаўцаў у сілавыя структуры Беларусі. Жонка палітвязня Вольга Івашына распавяла @bnkbel пра стан мужа і цэнзуру ў ліставанні:

— З здароў'ем, кажа, усё нармалёва, не хварэе і не заўважыў ніякіх кепскіх зьменаў у сваім фізычным стане. Мы хваляваліся за ягоны зрок, бо і без таго быў не ідэальны, а там пастаяннае штучнае асьвятленьне. Але Дзяніс нас супакоіў, нібы вастрыня зроку не папсавалася за гэтыя 33 месяцы.

Лісты даходзяць амаль усе. Адзін ліст ад маці Дзянісу чамусьці зьнішчылі нядаўна, яму сказалі, праз "цынічны зьмест". Але там былі раздрукоўкі з навінамі, у тым ліку зь дзяржгазэты, таму можам толькі здагадвацца, што цэнзарам не спадабалася. Ну і да мяне без аніякіх тлумачэньняў не патрапіў адзін зь лістоў Дзяніса яшчэ за верасень месяц.

Ва ўсім іншым, можна сказаць, цішыня і спакой: Дзяніс чытае кнігі (нават замовіў сабе парачку праз "кніжны клюб", але ў асноўным карыстаецца нутранай бібліятэкай жодзінскай вязьніцы. Ну і гадзіну на дзень ён можа пашпацыраваць ва ўнутраным дворыку, заняцца фізкультурай, хуткай хадой прайсьціся для падтрыманьня фізычнай формы. Паколькі ніякіх перадачаў (апроч вітамінаў) яму пакуль перадаць нельга, Дзяніс сам набывае сабе на адну базавую велічыню прадукты ў нутранай краме. У асноўным ён там марскую капусту і цыбулю бярэ. Неяк натрапіў на шпік, то быў шчасьлівы!