Bugun “INNO” innovatsion o‘quv-ishlab chiqarish texnoparkida Vazirlar Mahkamasining 2021-yil 19-apreldagi 222-son qarori asosida tashkil etilgan “Akademik harakatchanlik” dasturning 2026-yil 2-choragi tanlov bosqichidan muvaffaqiyatli o‘tgan g‘oliblar bilan uchrashuv bo‘lib o‘tdi.
Dastlab yosh olimlar bilan “INNO” texnopark bosh direktori A.Ilxamov muloqot o‘tkazdi. Shundan so‘ng, ularga texnoparkning faoliyati va mavjud imkoniyatlari yuzasidan ma’lumot berilib, laboratoriyalar va texnik ishlab chiqarish zonalari bo‘ylab innotur tashkil etildi.
Ma’lumot uchun, “Akademik harakatchanlik” dasturi yosh olimlarga o‘z ish joyidan ajralmagan holda yetakchi markazlarda ilmiy-tadqiqot ishlarini olib borish, zamonaviy ilmiy laboratoriyalar va asbob-uskunalardan foydalanish huquqini beradi. So‘nggi tanlov natijalariga ko‘ra, respublika bo‘yicha 8 nafar tadqiqotchi o‘z ilmiy faoliyatini “INNO” texnoparkda davom ettiradigan bo‘ldi.
Texnoparkda barcha g‘oliblar uchun zarur shart-sharoitlar yaratilib, ilmiy rahbarlar biriktiriladi hamda ularning amaliy va laboratoriya tadqiqotlarini yuqori saviyada o‘tkazishiga har tomonlama ko‘maklashiladi.
Bizni kuzatib boring:
Telegram | Instagram | YouTube