خبر دار ائیلہ یین عرشے، بوگون یاریم ڪوسوب مندن
قورولسون محشر ڪبرے، ڪے دیلداریم ڪوسوب مندن

دیلیم سیزلار، دیزیم چؤڪموش، دیلیمدہ التماسیم وار
تالانمیش ڪعبہ دیر ڪؤنلوم، ڪے زوّاریم ڪوسوب مندن

اونا ناز ائیلہ یردیم من، ڪساد اولماقدا بازاریم
مطاعیم دوشدو قیمتدن، خریداریم ڪوسوب مندن

سوسوب زابل، زمین خوارہ ن، سئگاهیم یاس توتوب یا رب
شڪایت ائیلہ ییر تئللر، ندن تاریم ڪوسوب مندن

پوزوب عهدین، دانیب قوولون، آلیب جانیم اَجَلدن تئز
دِیین غسالہ اَل قاتسین، بِہ ایلقاریم ڪوسوب مندن

پاییز مشّاطہ سے گلمیش، سارالدیب یام یاشیل یازیم
قویون تڪ باغبان بیلسین ڪے گولزاریم ڪوسوب مندن

(ڪؤنول) سوسموش، قلم یازمیر، ڪولڪ دوندوردو بُستانیم
دئیین بیر دَم سڪوت اولسون، شَڪَر باریم ڪوسوب مندن


✍فاطمه_عبدی_ڪؤنول


🌹💎