Балаҕан ыйын 21 күнүгэр Сунтаар улууһа сурукка киирбитэ 225 сылын үөрүүлээх үбүлүөйүн бэлиэтээтэ. Халлааммыт хара сарсыардаттан былытыран, күүстээх ардаҕынан кутан да ылаттаатар, дьон-сэргэ онтон иҥнибэккэ төрөөбүт улууһун үөрүүлээх тэрээһиннэригэр хото кытынна.
Арассыыйаҕа Норуоттар сомоҕолоһууларын, Саха Өрөспүүбүлүкэтигэр Култуура, Сунтаар улууһа сурукка – бичиккэ киирбитэ 225, Номох уонна сайдыы сылларыгар аналлаах «Сунтар – Ытык алаһам» өрөгөйдөөх күнүн үөрүүлээх аһылыыта анаммыт чааһыгар С.А. Зверев-Кыыл Уолун аатынан Кииҥҥэ саҕаланна.
Киин икки этээһинэн улуус, үбүлүөйдээх нэһилиэктэр историяларын кэпсиир быыстапкалар уонна музей кэллиэксийэлэрэ, “Дойдум дьоно урукку хаартыскаларга”, “Сунтаар улууһун биллиилээх дьоно-сэргэтэ, ытык-мааны сирдэрэ” уруһуй быыстапката, “Сэргэ төрдүгэр сэһэн” сыахай быыстапката дьон болҕомтотун тартылар. Манна улуус төрүттэниититтэн билиҥҥи күҥҥэ диэри кэпсиир, дьоһуннаах дьонун, историятын, култууратын көрдөрөр экспонаттар турдулар.
Л.А.Попов аатынан кииннэммит бибилэтиэкэ “Сунтаар – үйэттэн үйэлэргэ” быыстапкатыгар улуус туһунан араас сылларга бэчээттэммит кинигэлэри билиһиннэрдэ уонна “Ааһан иһэн аах” диэн аахсыйа оҥордо.
Улууспут өрөгөйдөөх күнүн аһыллыытыгар аналлаах үөрүүлээх тэрээһинигэр баһылык А.В. Григорьев уонна нэһилиэктэр баһылыктара киириилэрэ биир туспа ураты көстүү буолла. Нэһилиэктэртэн баһылыктары сэргэ бочуоттаах, ытыктанар олохтоохтор, үлэһиттэр кэлбиттэрэ мустубут дьону долгутта. Алексей Степанов режиссердаан туруорбут улуус историятын кэпсиир театрализованнай көстүүтүн дьон махтайа көрдө. Ол кэннэ улуус баһылыга эҕэрдэ тылы эттэ, дьиэ кэргэҥҥэ, чулуу үлэһит, улуус сайдыытыгар кылаатын киллэрбит дьоҥҥо наҕараадалары туттарда.
Бу күн Сунтаарга өссө биир долгутуулаах түгэн тосхойдо. Сунтаар улууһун үбүлүөйүн күнүгэр О.К. Сосин аатынан Сунтаардааҕы политехническэй лицей-интэринээт саҥа дьиэтин аанын тэлэччи арыйда. Лицей улууска бастакы тэхиниичэскэй үөрэхтээһини тэрийэн, дойду араас муннуктарыгар үлэлиир каадырдары бэлэмнээн таһаарар бастыҥ кыһанан биллэр.
Лицей саҥа дьиэтэ В.В. Путин көүлээбит “Ыччат уонна оҕолор” диэн национальнай бырайыак иһинэн үлэлиир “Үөрэх сайдыыта” судаарыстыбаннай бырагырааманан үс сыл тутулунна. Тутууну Анатолий Исаев салайааччылаах “Главстройкомплекс” тэрилтэ тутан кэмигэр бүтэрдэ. Сунтаар олохтоохторо, тэрилтэлэр, төрөппүттэр сомоҕолоһон, түмсэн хас да ый буолуох үлэни түргэн кэм иһигэр бүтэрбиттэрэ хайҕабыллаах.
Күнүс улуус айар коллективтара, эстрада сулустара кэлбит дьону үөрдэн, дьоро күнү бэлэхтээтилэр. Сахалыы оһуохай, ырыалар-тойуктар, үҥкүү-битии бырааһынньыгы киэргэттэ.
Маны сэргэ манежка “Күһүҥҥү киһи күлбүтүнэн” атыы-эргиэн дьаарбаҥката кыайа-хото ыытылынна. Манна хаһаайыстыбалар, чааһынай дьон үүннэрбит астарын, заготовка арааһын, эттэн, үүттэн бородууксуйа атыыланна. Кэлбит дьон күһүҥҥү “Көмүс күһүн” фотозоналарга хаартыскаҕа хатанан, баҕарбыт астарын ылан дуоһуйдулар.
Улуус стадионугар “Сыһыыга сырсыахха, хонууга оонньуохха” оҕолорго аналлаах араас оонньуу тэрилиннэ. Кырачааннарга Гонки в подгузниках күрэх кытта тэриллэн дьон интэриэһин тарта. “Кыстыкка бэлэмнэнии” диэн көрдөөх күрэхтэргэ эдэр да, аҕа саастаах да дьон күүстэрин, сымсаларын холостулар, дуомакка блиц-турнирга, Эрчим уонна дьулуур диэн маамыкта быраҕыы күрэҕэр кыахтарын холоннулар. Күһүҥҥү долгураҥ авангарднай муода кыттааччыларын сэргии көрдүлэр.
Сунтаар күнүн уруйдуур массыыналар парааттара буоларын курдук олус сэргэхтик ааста. Сунтаар былаахтарынан киэргэммит араас мааркалаах массыыналар субуруһан ааһаллара эмиэ бэйэтэ кэрэ көстүү буолла.
Дьоро күн Түүҥҥү Сунтаар - саха эстрадатын сулустара кыттыылаах кэнсиэр-дискэтиэкэнэн, өрө көтөҕүллүү салютунан түмүктэннэ.
https://max.ru/id1424005501_gos/AaDGrbkNIOs