Мәскеуде III Discover Atom халықаралық туристік форумы ашылады

15–17 қазанда ВДНХ-дағы «Атом» музейінде III Discover Atom халықаралық туристік форумы өтеді. Оған 1500-ден астам қатысушы, соның ішінде БРИКС елдерінен 10 делегация келеді деп күтілуде. Биылғы тақырып – «Ғылым – болашақ адамының тілі». 16 қазанда форум кең аудиторияға ашылады.

Сарапшылар қатарында Гизадағы Үлкен Мысыр музейінің, Оңтүстік Африканың Iziko музейлер тобының, Таиландтың Ұлттық ғылым музейінің және басқа да мекемелердің өкілдері бар. Басты оқиға БРИКС+ ғылыми-технологиялық музейлер альянсының отырысы болмақ. Қатысушылар альянсты кеңейту мәселесін талқылап, «2027 - 2030 жылдарға арналған жол картасын» қабылдайды. Құжатқа туристерге арналған ұсыныстар, БРИКС Ғылым фестивалі және музей мамандарына арналған тағылымдамалар енеді.

«Атом» музейі «Росатомның» қолдауымен салынған. Бұл – Ресейдегі ең заманауи ғылыми-танымдық алаңдардың бірі. Көрме кеңістіктерінің ауданы 25 мың м²-ден асады. Экспозиция кеңестік атом жобасының тарихынан басталып, қонақтар ғылыми тәжірибелерді өздері жасай алатын интерактивті «Атомариумға» дейін жалғасады.