Мысырдағы «Эль-Дабаа» АЭС-інің №2 энергоблогында реактор корпусы жобалық орнына орнатылды.
Бұл – атом электр станциясы құрылысындағы негізгі кезеңдердің бірі.
Болашақта дәл осы корпустың ішінде энергия өндірілетін реактордың белсенді аймағы орналасады. Салмағы 340 тоннадан асатын жабдық 1350 тонналық шынжыр табанды кранның көмегімен 0,1 мм дәлдікпен орнатылды.
Енді құрылыс келесі маңызды кезеңге – негізгі циркуляциялық құбырды дәнекерлеуге көшеді. Бұл құбыр реакторды бу генераторларымен және бірінші контурдың негізгі жабдықтарымен байланыстырып, жылу тасымалдағыштың үздіксіз айналымын қамтамасыз етеді.
«Росатом» мемлекеттік корпорациясының бас директоры Алексей Лихачёвтің айтуынша, жоба жоғары қарқынмен жүзеге асырылып жатыр: бірінші энергоблоктың реактор корпусы небәрі жеті ай бұрын орнатылса, бүгінде дәл осындай операция екінші блокта да сәтті аяқталды. Бұл станцияның бірнеше энергоблогында құрылыс жұмыстарының қатар жүргізіліп жатқанын көрсетеді.
«Эль-Дабаа» – Мысырдағы алғашқы атом электр станциясы және «Росатомның» шетелдегі ең ірі жобаларының бірі. Станцияда әрқайсысының қуаты 1200 МВт болатын ВВЭР-1200 реакторларымен жабдықталған төрт энергоблок салынуда. Бұл жоба Ресейдің атом технологияларын кешенді экспорттаудың үлгісі болып табылады: құрылыспен қатар жабдықтар жеткізіліп, инженерлік шешімдер ұсынылады және ұзақ мерзімді әріптестік қалыптасады.