معقولة الميت روحه ترجعله !

ايه ولكن تابعو معاي وركزو كويس

الموت علينا حق وهلبا يخوفو فينا من القبر مع ان النعيم يلي حيتلقاه المؤمن في قبره شيء يفوق الجمال .!♥️

هل حاولتو تفكرو قبل ياترا ماذا بعد الموت ..؟

شوفو اول شيء غالطين لو تحسابو ان الموت هو النهاية ابداً الموت هوا البداية لكل شيء ..

سامعين اكيدة بـ حياة البرزخ صحيح ؟

باهي شن معناها البرزخ ؟!

البرزخ معناها فاصل او حاجز بين شيئين

الحياة والموت

مثل قوله تعالى ( مَرَجَ الْبَحْرَيْنِ يَلْتَقِيَانِ بَيْنَهُمَا بَرْزَخٌ لَا يَبْغِيَانِ)

تمام عرفنا معنى كلمة البرزخ ..

نجو توا لمصير الإنسان بعد دفنه

شوفو العلماء كلهم ولما نقولكم علماء معناها مش حاجة ساهلة يعني ناس قرت وتعبت واجتهدت باش توصلنا معلومة حقيقية ..

اتفقو العلماء على ان الإنسان بعد موته يسأل سوا كان مدفون في القبر او ميت في البحر ان شاءالله حتى متفتفت حشاكم يسأل ..

الانسان اول ماينحط في القبر روحه ترجعله ثاني ويسمع صوت خطوات الناس وهما مروحين ومخليينه ..

بعدين يجوه ملكين يقولوله

من ربك ؟
ما دينك؟
ومن هوا الرجل الذي بعث فيكم ؟

المؤمن حيجاوب الأجوبة صح بعدين يجيه واحد من الملك يفتحله باب النار ويوريله مقعد ويقوله شوف هذا مقعدك في النار أبدلك الله به مقعداً في الجنة ..

بعدها الله عز وجل ينادي الملكين ويقوللهم أَنْ صدق عبدي، فأفرشوه من الجنة والبسوه من الجنة ..

تخيلو الله بجل جلاله يخاطب الملائكة مباهي فيك طبعا المؤمن لما بيشوف الحاجات هادي بيبدا يدعي يارب اقم الساعة يارب اقم الساعة🥺♥️

بعدها يجيه راجل جمييييل هلبا هلبا وريحته فايحة ويقوله ابشر متخافش هذا اليوم يلي عملت من اجله فيستغرب المؤمن ويقوله مني انت؟!

يقوله انا عملك الصالح ..

بعدين القبر يتوسع 70 ذراع وينورهوله الله سبحانه وتعالى

من ثم يلبث في قبره وكأنه عريس او عروسة في ليلة عرسها شوفو الوصف النبوي للنعيم سبحان الله فعلاً فرحة اول يوم زواجك غير ..🥺

هذا مني هذا المؤمن ..

نجو للمنافق والكافر

الاجوبة طبعاً مش حيجاوب عليها وبيقول مادريت وماتليت ..

حيصيبه من العذاب ماهو مُقدر له ..
وحيدعي لله ربي لا تقم الساعة

وطبعاً منبيش نخضولكم فيه الموضوع لان اغلب العلماء تجنبوا الحديث عليه لإن ولله الحمد حني مسلمين ميهموناش الكفار شن عذابهم ..

باهي شن شكل الملكين يلي بيجونا بيسألونا وشن اسمهم ؟

اسمهم منكر ونكير ولونهم اسود وازرق

عن أبي هريرة رضي الله عنه قال: قال رسول الله صلى الله عليه وسلم: «إذا قبر الميت أو الإنسان أتاه ملكان أسودان أزرقان، يقال لأحدهما المنكر وللآخر النكير

تعالو توا نحكيلكم معلومة ثانية عن نعيم القبر ..
المؤمنين والشهداء والصالحين متحسابوهمش نائمين والسلام لا .!

ارواح المؤمنين قاعدة في الجنة على هيئة عصافير تسرح وتغرد في الجنة وتأكل من خيارتها وثمارها ..

وهذا كلام ابن باز

والدليل

‎- أنَّ أرواحَ المؤمنين طائرٌ يَسيحُ في الجنَّةِ وأرواحَ الشهداءِ في أجوافِ طيرٍ خُضرٍ تسرحُ في الجنَّةِ حيث شاءت ثم تأوي إلى قناديلَ معلَّقةٍ تحت العرشِ.
‎الراوي : - | المحدث : ابن باز | المصدر : فتاوى نور على الدرب لابن باز | الصفحة أو الرقم : 4/320 | خلاصة حكم المحدث : صحيح

وبس انتهينا🫶
..

اللهم اجعلنا من المؤمنين المنعمين في قبورهم يارب العالمين .