Turdimov Erkinjon Oqbutayevich Bosh vazirning birinchi o‘rinbosari — ta’lim va ilm-fan vaziri etib tayinlandi

Bir tuman, to‘rt viloyat, 25 yildan ortiq rahbarlik tajribasi. Erkinjon Turdimovning mehnat faoliyati bank tizimidan boshlanib, Xatirchi tumani, Navoiy, Surxondaryo, Samarqand va bugungi Sirdaryo rahbarligigacha davom etdi.

Erkinjon Oqbutayevich Turdimov 1969-yil 10-iyulda Samarqand viloyatida tug‘ilgan. Mutaxassisligi — iqtisodchi.

Mehnat faoliyatini bank tizimida boshlagan. Keyinchalik Zarafshon shahri hokimi o‘rinbosari, Milliy bankning Navoiy bo‘limi boshqaruvchisi kabi lavozimlarda faoliyat yuritgan. Uning rahbarlik faoliyatidagi e’tiborga molik jihat — bir tuman va ketma-ket bir nechta viloyatlarni boshqargan tajribali hokimlardan biri ekanidir.

2000–2008-yillarda Xatirchi tumani, 2008–2016-yillarda Navoiy viloyati, 2016–2018-yillarda Surxondaryo viloyati, keyinchalik Samarqand viloyatiga rahbarlik qilgan. 2025-yilda esa Sirdaryo viloyati hokimi vazifasini bajaruvchi etib tayinlanib, shu yil dekabr oyida viloyat hokimi lavozimiga tasdiqlangan.

Shu jihatdan uning faoliyat geografiyasi ham o‘ziga xos: Navoiy — Surxondaryo — Samarqand — Sirdaryo. Turli iqtisodiy, demografik va hududiy xususiyatlarga ega viloyatlarda rahbarlik qilgani uning davlat boshqaruvidagi katta tajribasini ko‘rsatadi.

Davlat xizmati davomida “Mehnat shuhrati” ordeni hamda 2024-yilda “Fidokorona xizmatlari uchun” ordeni bilan mukofotlangan.