#ئیل_بایرامی
♦️گوزل بیر شعر
✍ #استادکریمی‌مراغه‌ای
گئنه بایرام گلوری خلقی سالا دردسره
باهالیقدی قاپونی باغلا داداش قاچ سفره
شیرنی آجیل باها،میوه باها،تشریفات آغیر
آتادان قالما بایات ثروتی وئرمه هدره
گئت دولان گز ، گوروشی ساخلا سفردن گلنه
عاقل اول زیرک آدام نفعینی وئرمز ضرره
گلن اولسا گوروشه قوی قاپونی امضالاسین
خاطرات دفتری اولسون قاپی هر رهگذره
#بایرام اوندایدی که ملتده صداقت واریدی
دای اورکلر داش اولوب کیم یانوری بیر نفره
گوتورولدی ایچیمیزدن کرم و مهر و وفا
دولانوب قرمزی بایراملاریمیز اولدی قره
بایرام اوندایدی که ائولر دولی،نعمت بولودی
ایندی کفلت شامی کامل یئسه قالماز سحره
سوجوقون حالوانین ایده یمیشین گردکانین
برکتلیدی قالاردی چوخی سیزده بدره
کئفه باخ، اوچ کبین اوچ صیغیه دویمازدی کیشی
گئنه بوندان بئله اوخشاردی نفیری فنره
ایندی بیر آروادی راضی ائلینمور خان عمو
شب جمعه کیشی بوزبوز باخوری ماه زره
ایندی کیمدی قویا شوربا قوناقین سفره سینه
گرک آماج اولا ریشخندیله مین نیشتره
#بایرام اوندایدی که هر زاد صلواتیدی داداش
نه چایا قنده بو قیمت واریدی نه شکره
قویمادی ملته بایرام قالا بو رسم جدید
ایندی بیر سالخیم اوزومدن ساری دیرماش چپره
قاش آتاردیق پنیره،شور لورا، سوزمه، قاتیقا
سفره میزده واریدی ایستی لواش تازه کره
ایندی قارقا کیمی بیر قاش پنیرین حسرتی یوخ
آری دنیاده مکافات عمل وار بشره
ای #کریمی او گوزل نعمته کفران ائلدون
ایندی ائت نفسیوی تسلیم قضا و قدره
✍ #زنده_یاد_استاد_کریمی_مراغه‌ای
Post #20102
41.7K
- 👍 72
- ❤ 18