Күндээдэ дьокутааттара саҥа баһылыктарын талыахтара
Алтынньы 5 к. нэһилиэк дьокутааттарын Сэбиэтин уочарата суох аһаҕас сиэссийэтэ ыытылынна. Манна улуус баһылыга Алексей Иннокентьев, улуус МТ баһылыктарын Сэбиэтин бэрэссэдээтэлэ, Сүлэ нэһилиэгин баһылыга Дмитрий Иванов, улуус дьаһалтатын нэһилиэктэри кытта үлэ уонна тэрээһин-быраап боппуруостарын управлениетын салайааччыта Лариса Николаева кытыннылар.
Сиэссийэ түмүгүнэн нэһилиэк дьокутааттара нэһилиэк баһылыга Анатолий Петров Анал байыаннай дьайыыга хантараагынан сулууспалыы барбытынан сибээстээн, кини көҥүл өттүнэн дуоһунаһыттан уурайар сайабылыанньатын көрөн кини боломуочуйатын тохтотор туһунан быһаарыы ылыннылар. Итиэннэ нэһилиэк Устаабыгар олоҕуран, саҥа баһылыгы талыы үлэтин хаамыытын бигэргэттилэр.
Нэһилиэк баһылыгын талыы саҥа бэрээдэгин быһыытынан, үлэлээн бүппүт баһылык боломуочуйатын болдьоҕо нэһилиэк дьокутааттарын Сэбиэтинэн тохтотуллубут күнүттэн, 10 күн иһинэн улуус баһылыга СӨ Ил Дарханыгар биллэрэр. Ил Дархан кими нэһилиэк баһылыгын эбээһинэһин быстах кэмҥэ толорооччунан аныыр туһунан Ыйаах таһаарар. Нэһилиэк Сэбиэтин дьокутааттара 40 күн иһинэн нэһилиэк баһылыгар куонкурус биллэриллэрин туһунан быһаарыы ылыныахтаахтар. Күндээдэҕэ 8 киһилээх конкурснай хамыыһыйа тэриллэр. Бу хамыыһыйа аҥара, ол эбэтэр 4 киһи - нэһилиэк Сэбиэтэ быһаарбыт дьоно, атын 4 киһитин улуус баһылыга уураах таһааран бигэргэтэр.
«СӨ-гэр олохтоох салайыныы туһунан» СӨ сокуонугар киирбит уларыйыыларга сөп түбэһиннэрэн, нэһилиэк уонна улуус салалтатын быһаарыыга дьокутааттар оруоллара улаатта. Конкурснай хамыыһыйа баҕалаах дьонтон сайабылыанньаларын тутан көрөн, нэһилиэк Сэбиэтин көрүүтүгэр 2-тэн итэҕэһэ суох дьону киллэрдэҕинэ дьокутааттар куоластаан быһаараллар. Нэһилиэктэр Устааптарыгар куоластааһын аһаҕас эбэтэр кистэлэҥ буолара чопчуланан сурулла сылдьар.
Улуус дьаһалтатын пресс-сулууспата.