Сумесны матэрыял MOST Media і Hrodna.life заняў трэцяе месца на журналісцкім конкурсе «Вольнае слова-26». Тэкст Руслана Кулевіча і Аляксея Шоты „Страцілі ўсё, акрамя жыцця“. 85 гадоў таму ўнука прэзідэнта Гродна вывезлі з горада ў чамадане — цяпер ён па крупінках аднаўляе гісторыю сям’і адзначылі ў намінацыі «Інфармацыйны жанр».

Гісторыю Эндру Стэмпнеўскага, унука прэзідэнта Гродна журналісты запісалі ў чэрвені 2025 года. Яна стала апошняй гісторыяй у кнізе Руслана Кулевіча «Апошнія сведкі Гродна».

Эндрю Стэмпнеўскага вывезлі з Гродна немаўляткам у 1940 годзе. Каб выратаваць сына ад савецкіх рэпрэсій, маці схавала яго ў чамадане і дала снатворнае, каб дзіця не закрычала ў дарозе. Пазней сям’я апынулася ў ссылцы, сустрэла армію Андэрса і разам з ёй праз Іран і Палестыну дабралася да Еўропы. Большую частку свайго жыцця Стэмпнеўскі пражыў у ЗША.

— Мне не хапала такой кропкі. А гэтая гісторыя стала прыгожым заканчэннем. Як быццам я павінен быў дачакацца гэтага чалавека. Ён дагэтуль марыць убачыць Гродна. Яго гісторыя і наогул гісторыі многіх рэпатрыянтаў чымсьці падобныя да нашых. Яны чакалі шмат гадоў, каб атрымаць магчымасць прыехаць у Гродна і паглядзець на свой дом», — успамінае Руслан Кулевіч.

Вынікі традыцыйнага штогадовага конкурсу «Вольнае слова» абвясцілі ў Вільні 18 верасня. Конкурс праводзіцца для ўдасканалення прафесійнага майстэрства супрацоўнікаў СМІ і падтрымкі таленавітых журналістаў.

На фота галоўны рэдактар MOST Media Руслан Кулевіч.