Ko‘rindi bu kecha gulda munojot,
Zaboni hol bilan kechdi muloqot.

Dedim: “Ey gul, nechun chehrang qizildir?”
Dedi: “Ey qul, yuz izhori ko‘ngildir”.

Dedim: “Nedan ajab nozikbadansan?”
Dedi: “Dil nozik ersa, naylasin tan?!”.

Dedim: “Jismingda yo‘q g‘unchangdagi bo‘y?”
Dedi: “Xulqing og‘izdan ko‘rsatar bo‘y”.

Dedim: “Barging yashil erkan, go‘zaldir”,
Dedi: “Orzu-umidlardan masaldir”.

Dedim: “So‘lg‘in ko‘ringaysan xazonda?”
Dedi: “Bu yerga yotmoqdan nishon-da”.

Dedim: “Hosillaringni ne qilarsan?”
Dedi: “Suv ichgan o‘rnimga to‘karman”.

Dedim: “Uzmish gulingni bir necha yosh?”
Dedi: “To lab ochildi, ketdi bu bosh!”

Dedim: “Bormi sening bir bog‘boning?”
Dedi: “Jisming turarmi, yo‘qsa joning?”

Dedim: “Bulbul senga oshiq ekan ko‘p?”
Dedi: “Bog‘bondir ishq ahliga mahbub”.

Dedim: “Har yaprog‘ing san’at nishoni”,
Dedi: “Har biri bog‘bon dostoni”.

Dedim: “Nega boqarsan ko‘kka doim?”
Dedi: “Dil talpinar, aytib «ilohim»”.

Dedim: “Qancha quyoshdan bahravar tan?”
Dedi: “Har qancha unga yuzlanarman”.

Dedim: “Yoningda bu ajriqqa ne bor?”
Dedi: “Tushsa nazarlar, aylagay kor”.

Dedim: “Nega go‘zallik ramzi sensan?”
Dedi: “Doim tabassum sunnat erkan”.

Dedim: “Sen qo‘lma-qo‘l xalq ichra doim”,
Dedi: “Sen ham tikonsiz bo‘l, muloyim”.

Dedim: “El yuzingga maftun bo‘larlar?”
Dedi: “Badbo‘y esam, tashlab ketarlar”.

Dedim: “Essa shaboda tebranarsan?!”
Dedi: “Gar tebranolmasang, sinarsan!”

Dedim: “Ari asal olgay gulingdan”.
Dedi: “Yaxshi, yomon bori tilingdan”.

Dedim: “Husningga oshiqlar sanoqsiz”,
Dedi: “O‘tkinchi husn ishqqa yaroqsiz”.

Dedim: “Qumg‘oq nega gul-g‘uncha ochmas?”
Dedi: “Bebahra suv birlan ko‘karmas”.

Dedim: “Mevang yo‘g‘-u, sen serxaridor?”
Dedi: “Xushchehralikda yaxshilik bor”.

Dedim: “Jismingni yulgan(ni) netarsan?”
Dedi: “Ilgin o‘pib, atrim separman”.

Dedim: “Nedir hayoting qildi barbod?”
Dedi: “Barvaqt ochilmoq bo‘ldi, hayhot!”

Dedim: “Qaydansan-u, so‘ng qayga ketmoq?”
Dedi: “Tufroqdan-u, tufroqqa qaytmoq”.

Dedim: “Bu o‘rtada sha’ningga ne bor?”
Dedi: “Gullik vazifam qilmoq izhor”.

Dedim: “Umring, valekin, uncha ermas”,
Dedi: “Bir gul bo‘lishga yetmog‘i bas”.

Dedim: “Endi qachon sen-la ko‘rishmoq?”
Dedi: “Sen-la ko‘rishmoq o‘rni uchmoq”.

Dedim: “Menga nasihat ayla bir dam”,
Dedi: “Tufroqni yod et, ojiz odam!”

Dedim: “Menga vasiyat qil, qadrdon”,
Dedi: “Qullik vazifang, hazrat inson!”

Husaynxon Yahyo Abdulmajid