⚡️Рэжым здзейсніў буйную правакацыю на беларуска-латвійскай мяжы

На гэтым тыдні ўзброеныя і агрэсіўна настроеныя людзі ў масках з боку Беларусі спрабавалі пераправіць у Латвію групу нелегальных мігрантаў. Пра гэта паведамілі Нацыянальныя ўзброеныя сілы Латвіі.

Паводле слоў латвійскіх вайскоўцаў, група як мінімум з 20 мігрантаў пад кіраўніцтвам людзей у масках паспрабавала незаконна перасячы беларуска-латвійскую мяжу. Латвійскія вайскоўцы спынілі спробу пераходу.
У латвійскай арміі адзначылі, што ў параўнанні з многімі папярэднімі падобнымі выпадкамі на гэты раз дзеянні мелі асабліва дэманстратыўны і агрэсіўны характар. Людзі, якія суправаджалі мігрантаў, былі ўзброеныя, пагражалі латвійскім вайскоўцам, а таксама актыўна падштурхоўвалі і гналі мігрантаў у бок тэрыторыі Латвіі.

Праз некалькі гадзін пасля гэтага здарэння людзі ў масках ужо самі праніклі на тэрыторыю Латвіі. Яны пашкодзілі электрычную размеркавальную шафу і скралі камеры назірання.

У гэтым інцыдзенце кідаюцца ў вочы тры аспекты:

- Рэжым фактычна спыніў гібрыдныя атакі супраць Польшчы, затое перанакіраваў іх у бок Літвы і Латвіі. Тым самым робіцца спроба "расцягнуць" саюзнікаў па НАТА, абудзіць іхні нацыянальны эгаізм і прымушаць дамаўляцца з Лукашэнкам паасобку, а не як калектыўны суб’ект.

- Апошнім часам некаторыя беларускія аналітыкі сталі казаць пра "прагматычнае пацяпленне" між Лукашэнкам. На Нашай Ніве нават выйшаў цэлы артыкул на гэтую тэму, маўляў, патрабаванні да Лукашэнкі знізіліся, і зараз ад яго патрабуюць толькі не лезці да суседзяў. Як бачым, не лезці да суседзяў Лукашэнка не можа, і чакаць ад яго спакойных паводзінаў ва ўмовах поўнай геапалітычнай залежнасці ад Расіі - марна.

- Ступень абароны латвійскай мяжы яўна недастатковая. Калі туды змаглі пранікнуць беларускія дыверсанты, змогуць пранікнуць і расійскія. Улады Латвіі, відаць, дагэтуль да канца не разумеюць, што адбываецца ў рэгіёне і да чаго трэба рыхтавацца.