Сёння, 5 кастрычніка, мы пачынаем наш штогадовы Тыдзень супраць смяротнага пакарання. Наперадзе шэсць дзён размоў, дыскусій, праваабарончых выступаў, кіно, музыкі і нават футбола, каб яшчэ раз гучна сказаць: Беларусь павінна адмовіцца ад смяротнага пакарання.
Сёлета міжнародны рух адзначае Сусветны дзень супраць смяротнага пакарання 10 кастрычніка пад тэмай Stories for Life — «Гісторыі дзеля жыцця». У цэнтры кампаніі — людзі, якіх закранае смяротнае пакаранне: асуджаныя, іх сем’і, сем’і ахвяр, адвакаты, праваабаронцы і ўсе тыя, чые галасы часта губляюцца за статыстыкай і судовымі справамі.
У 2025 годзе Amnesty International зафіксавала не менш за 2707 пакаранняў смерцю ў 17 краінах — на 78% больш, чым годам раней (гэта без тысяч меркаваных пакаранняў у Кітаі, дзе інфармацыя застаецца дзяржаўнай таямніцай). Адначасова глабальная тэндэнцыя застаецца абаліцыянісцкай: 145 краін ужо адмянілі смяротнае пакаранне ў заканадаўстве або на практыцы.
Беларусь па-ранейшаму застаецца адзінай краінай Еўропы, дзе смяротнае пакаранне захоўваецца і можа прымяняцца. Пры гэтым 2025 год стаў першым з 1994 года, калі Amnesty International не зафіксавала ў Беларусі ні новых смяротных прысудаў, ні пакаранняў смерцю.
Што мы робім на гэтым тыдні? Шукайце поўны анонс па спасылцы і далучайцеся да івэнтаў, альбо ўласнымі галасамі супраць смяротнага пакарання ў сацыяльных сетках.