Ramazon vaqtida yuqori unumdorlik bilan ishlash.

Ko'pchilik dasturchilar Ramazon vaqtida unumdorlikni yo'qotib qo'yadi va kompyuter oldida ishlash doimgidan ko'ra biroz qiyinlashadi. Bu oy davomida kun tartibini to'g'ri taqsimlash juda muhim hisoblanadi. Kimgadir foydali bo'lishi mumkin dedim va o'zim uchun reja qilgan kun tartibini sizlar bilan ham bo'lishishga qaror qildim.

Saharlik qilib, bomdod namozini o'qigandan so'ng Qur'on va zikrlarga vaqt ajrating.

Erta tongdan - peshingacha eng muhim va qiyin vazifalarni bajarishga harakat qiling, chunki bu vaqtda quvvatingiz ko'proq bo'ladi va shu sababli ishlash osonlashadi. Osonroq va uncha fokus kerak bo'lmagan vazifalarni keyinroqqa olib qo'ying.

Peshinni o'qib bo'lib, qisqa tanaffus qiling va miyaga dam bering. Tanaffus vaqtlarini namoz vaqtlariga to'g'irlab olsangiz ham bo'ladi.

Iloji boricha Asrgacha barcha ishlarni tugatishga harakat qiling, chunki undan keyin nimadir qilishga harakat qilib o'zingizni qiynaganingiz qoladi holos. Uning o'rniga, oilangizga ovqat tayyorlashga yordam bering, iftorlik qiling va Shom namozini o'qing.

Keyin esa, Xufton va Tarovehga tayyorgarlik ko'ring. Bu vaqt davomida iloji boricha ko'proq ibodatda bo'lishga va og'zingiz ochiq paytida ko'proq suv ichishga harakat qiling.

Unutmang, eng unumdor vaqtingiz erta tongda bo'ladi. Bu vaqtni o'tkazib yubormaslik uchun ertaroq uxlashga harakat qiling. Shuningdek, jamoadoshlaringizga vaziyatingizni tushuntirib, kun tartibingiz haqida ularni xabardor qilib qo'yishni unutmang.

Barchamizga yana bir bor Ramazon oyi muborak bo'lsin.

@mabrur_dev