Qarshi davlat texnika universitetida magistrantlar uchun ilmiy-amaliy uchrashuv o‘tkazildi
Neft-gaz va geologiya fakultetida magistratura talabalari ishtirokida “Ilmiy tadqiqot uchun ilk qadam” mavzusida ilmiy-amaliy uchrashuv bo‘lib o‘tdi.
Tadbirdan ko‘zlangan asosiy maqsad talabalarning ilmiy salohiyatini oshirish hamda nazariy bilimlarni bevosita amaliyot va ishlab chiqarish jarayonlariga tatbiq etish ko‘nikmalarini shakllantirishdan iborat bo‘ldi.
Uchrashuvda rektor maslahatchisi N.Jo'rayev, magistratura bo‘limi boshlig‘i H.Sag‘diyev, xalqaro hamkorlik boʻlimi mas'ul xodimi B.Aliyev hamda fakultet kafedra mudirlari o‘z mulohazalarini bildirdilar.
Mutaxassislar tomonidan yosh tadqiqotchilarga ilmiy ish olib borish metodologiyasi, dolzarb muammolarga to‘g‘ri yechim topish va tadqiqot o‘tkazishning asosiy bosqichlari sodda va tushunarli misollar yordamida tushuntirib berildi. Xalqaro hamkorlik istiqbollari haqida ham so‘z bordi.
Shuningdek, tadbir davomida talabalarni huquqiy savodxonligini oshirish masalasiga ham alohida e’tibor qaratildi. Xususan, O‘zbekiston Respublikasi Vazirlar Mahkamasining 500-sonli qarori mazmun-mohiyati talabalarga yetkazildi.
Xuddi shu kabi tadbir Raqamli texnologiyalar va sunʼiy intellekt fakultetida ham oʻtkazildi.
Bizni birga kuzatib boring: 👇
🌐 Website | 📱 Facebook | 📱 Instagram | 📱 YouTube
QarDTU axborot xizmati ✍️