🚩 پەیامی سەرەخۆشی کۆمیتەی ناوەندیی کۆمەڵە بە بۆنەی کۆچی دوایی کاک حەمە مستەفا سوڵتانی

بۆ بنەماڵەی بەڕێزی مستەفا سوڵتانی و خەڵکی ئازادیخوازی شاری سنە

بە خەم و پەژارەیەکی زۆرەوە ئاگادار بووینەوە کە کاک حەمە مستەفا سوڵتانی ڕۆژی ٢٧ی سێپتەمبەری ٢٠٢٦ لە تەمەنی ٨٤ ساڵیدا لە شاری سنە کۆچی دوایی کرد. تەرمەکەی لە گوندی زێدی خۆی، ئاڵمانە، لە تەنیشت براکانی گیانبەختکردووی بە خاک سپێردرا.

حەمە مستەفا سوڵتانی لە ساڵانی دەسەڵاتی کۆماری ئیسلامیدا کەسایەتییەکی کۆمەڵایەتی و جێی متمانەی خەڵک بوو. هەمیشە بەرگری لەو ئامانجانە دەکرد کە براکانی گیانی خۆیان لە پێناویدا بەخت کردبوو. هەر بۆیە، هەم کۆنەپەرستانی ناوچەکە و هەم دەزگا ئەمنییەکانی کۆماری ئیسلامی ڕق و کینەیەکی قووڵیان لێی لە دڵدا بوو. بەم هۆیەوە ساڵانێکی دوورودرێژ لە ژیانی لە تاراوگەدا بەسەر برد و چەندین جار بە بیانووی جۆراوجۆر زیندانی کرا و ئەشکەنجە درا. لەگەڵ ئەوەشدا، تا دوایین ساتی ژیانی بە ئامانجەکانی بنەماڵە تێکۆشەر و سەربەرزەکەی و بە ڕێبازی کاک فوئاد و براکانی دیکەی گیانبەختکردووی، ماجید، ئەمجەد ، ئه مین و حوسێن، وەفادار مایەوە.

کۆمیتەی ناوەندیی کۆمەڵە بەم بۆنە خەمناکەوە سەرەخۆشی لە هەموو ئەندامانی بنەماڵەی مستەفا سوڵتانی و لە خەڵکی سنە دەکات و خۆی بە هاوبەشی خەم و پەژارەیان دەزانێت.

یادی به رز و به ریز بێت.

کۆمیتەی ناوەندیی کۆمەڵە
(ريکخراوی کوردستانی حیزبی کۆمۆنیستی ئیران)

٢٩ی سێپتەمبەری ٢٠٢٦