للناس اللي بعرفهم وبيعرفوني، ولكل سوري بتوصله كلمتي:

يا أهلنا وأحبابنا … لا تتركوا ولادكم حطبًا لكراسيهم ❗️

والله بحبكم من قلبي 🤍💔
ومن كتر ما بحبكم، اندفعت وبالغت أحيانًا وأنا عم دافع عنكم❗️ وكنت غلطان لما خلطت بين حمايتكم وحماية سلطة، وبين أمانكم وبقاء مسؤول. وبعتذر لكل إنسان جرحته وأنا مقتنع إني عم دافع عن دولة رح تنبنى.

اليوم خايف عليكم. خايف نصحى بعد سنين، نلاقي ولادنا ضاعوا، وأهلنا تفرّقوا، واللي طلبوا منّا كل هالتضحيات أمّنوا مستقبل ولادهم وتركونا نحمل الصور ونبكي.

لهيك عم بترجّاكم: لا تكونوا حطب لطموحات هاي السلطة.

صالحوا مكوّنات سوريا. احكوا مع بعض، واسمعوا وجع بعض. ما عم اطلب من أم تنسى ابنها، ولا من مظلوم يسامح قاتله. طالبوا بالعدالة، بس لا تقبلوا إن بريئًا يدفع ثمن جريمة غيره.

المجرم بيتحاسب، سنّي أو علوي أو درزي أو شيعي أو أيًّا كان. وابن بلدك ما بيصير مجرمًا لأنه من مكوّن تاني، والمجرم ما بيستحق حمايتك لأنه من مكوّنك.

ديروا بالكم من المسؤول اللي بيقنعكم إن محاسبته خطر عليكم، وإن كرسيه هو آخر جدار بيحمي ولادكم. هيك بتصيروا تدافعوا عن امتيازاته بأعصابكم وعلاقاتكم، ويمكن بدمكم، بينما حقوقكم بتضيع.

قبل ما تشتم ابن بلدك دفاعًا عن هدا المسؤول اسأل نفسك أول شي : وين ابنه ووين ابنك⁉️

شو أمّن لعيلته، وشو ترك لعيلتك⁉️
وليش مطلوب منك تتحمّل وتضحّي، بينما هو مو مطلوب منه حتى يجاوب؟

وإنت يا أب، ويا أم، اللي خسرتوا ابنكم باشتباكات وأحداث وخلافات سياسية: مين جاوبكم إذا كان ممكن تجنّبها، ومين تحمّل مسؤولية القرار اللي دفع ابنكم ثمنه؟

هل أخدتوا تعويض⁉️
هل حدا دقّ بابكم بعد العزاء، وسألكم كيف عم تعيشوا، وشو ناقصكم، ومين رح يسندكم بعدما راح سندكم⁉️

وإنتِ يا أرملة اللي مات، هل في دخل مضمون إلك ولأطفالك، ولا تركوكي بين وجع الفقد وذلّ السؤال عن أجرة البيت والحليب والدواء⁉️

وإنت يا جدّ، ويا جدّة، اللي صرتوا تربّوا أيتام ابنكم: مين أمّن مستقبلهم؟ مين التزم بتعليمهم وعلاجهم، ومين رح يبقى حدّهم بعد ما تغيبوا؟

التعويض ما بيرجّع روح، بس غيابه بيترك العيلة تدفع ثمن الموت كل يوم.

ولما بيوصل خبر مقتل خمسة عناصر من أبناءنا في الأمن العام ، هل بيطلع الرئيس يسمّيهم ويواسي أهلهم، وهل بتتحرّك مؤسسات الدولة حتى تضمن حقوق عائلاتهم، ولا بيخلص حضورهم عند رقم ببيان؟

ليش ما يكون لكل واحد منهم اسم ووجه وحكاية بتعرفها الدولة اللي طلبت خدمته؟ وليش لازم أهله يركضوا ورا حقهم بعدما خسروا أغلى ما عندهم؟

وحيث يعيش ابن المسؤول برخاء وأمان، من حق أمّ العنصر تسأل: ليش مستقبل ابني كان قابلًا للتضحية، ومستقبل ابنك لازم يكون مضمونًا من كل الجهات؟

معقول ابن المواطن يكون غالي بس ساعة يحتاجوا يحمل سلاح، وبعد موته تصير أرملته عبئًا، وأيتامه ملفًّا ناطر توقيع؟

ولادنا مو رخاص. والسؤال اللي لازم يلاحق كل مسؤول: شو قدّمت لعيلة الشاب اللي طلبت منه يضحّي، وبأي حق بتطلب من أهله يضلّوا يصفّقوا إلك؟

أنا صرت شايف إن تخويف السوريين من بعض عم يخدم بقاء السلطة. كل ما سألنا عن فساد، خوّفونا من فتنة؛ وكل ما طلبنا محاسبة، قالوا البلد بخطر. طيب، مين رح يحمي البلد من الفساد ومن التحريض نفسه؟

ومن حقنا نعرف شو عم ينحكى باسمنا مع الخارج، وشو عم يُتعهّد فيه. السيادة ما بتنحفظ بالشعارات، وثقة الناس ما بتنبنى بالكذب والغموض.

يا أهلنا، لا تورّثوا ولادكم خصوماتنا. بكفّي اللي ورثوه من فقر وخوف وخراب. لا تخلّوا مسؤول يترك لابنه ثروة، ويترك لابنكم عدوًّا من أبناء بلده.

وأنا ما عم اطلب منكم تتبعوني. راجعوني وحاسبوني، ولا تعطوني ثقة عمياء. كل اللي بطلبه إنكم توقفوا لحظة، قبل أي تحريض، وتتخيّلوا وجه ابنكم مكان وجه الشاب اللي عم يُدفع ليموت.

أقولها أمام الله وأمامكم:

"ما بدي شوف أم سورية جديدة تضمّ صورة ابنها، واللي حرّضه عم يجهّز مستقبل ابنه"

بحبكم، ولهيك عم قولها بكل صراحة: احموا ولادكم، وصالحوا بعضكم، وحاسبوا اللي بيحكموكم.

لا تنتظروا حتى يصير ابنكم صورة على الحيط، لتسألوا إذا كان كرسي المسؤول بيستاهل عمره💔

عبد الله رحّال ✍🏼 15-10-2026
https://t.me/Jarablous_Jarablous/52153