✨ Farhod Ibragimov: Enterprise Uzbekistan biznes bilan birgalikda shakllantirilmoqda

ICT WEEK Uzbekistan 2026 doirasida o‘tkazilgan Enterprise Uzbekistan Summit tadbirida Enterprise Uzbekistan Boshqaruv raisi Farhod Ibragimov O‘zbekistonda yangi texnologik yurisdiksiyani shakllantirish tamoyillari hamda xalqaro kompaniyalar yangi bozorda faoliyat boshlash va investitsiya kiritish bo‘yicha qaror qabul qilayotganda e’tibor qaratadigan asosiy omillar haqida so‘z yuritdi.

Farhod Ibragimovning ta’kidlashicha, yangi bozorga kirayotgan biznes uchun, avvalo, uchta muhim masalada aniqlik bo‘lishi kerak: taqdim etilayotgan shartlarning uzoq muddat davomida saqlanishi, nizolar yuzaga kelganda ularni hal etish tartibi va soliq rejimi.

“Sudya kim bo‘ladi? Agar nimadir noto‘g‘ri ketsa-chi? To‘g‘rirog‘i, ‘agar’ emas, ‘qachon’ nimadir noto‘g‘ri ketsa?”

Uning so‘zlariga ko‘ra, kompaniyalar uzoq muddatli investitsiya qarorlarini qabul qilayotganda huquqiy aniqlik alohida ahamiyat kasb etadi. Biznes nizolar qanday tartibda ko‘rib chiqilishi, qaysi sud vakolatli bo‘lishi va qaysi qonunchilik qo‘llanilishini oldindan bilishi zarur.

“Bu qaror ijro etiladimi? Kim tomonidan? Qaysi sudda? Va qaysi qonun asosida?”

Enterprise Uzbekistan modelining asosiy tamoyillaridan biri uzoq muddatli barqarorlik va biznes uchun oldindan tushunarli muhit yaratishdir. O‘zbekistonda qabul qilingan Konstitutsiyaviy qonunga ko‘ra, Enterprise Uzbekistan’ning maxsus huquqiy rejimi 2100-yilgacha amal qiladi. Bu mamlakatda faoliyat yuritish va investitsiya kiritishni rejalashtirayotgan kompaniyalar uchun uzoq muddatli huquqiy asos yaratadi.

Yangi yurisdiksiyaning yana bir muhim jihati mustaqil nizolarni hal etish mexanizmining mavjudligidir. Farhod Ibragimovning qayd etishicha, kompaniyalar Enterprise Uzbekistan ma’muriyati tomonidan qabul qilingan qarorlarga nisbatan mustaqil sudga murojaat qilish imkoniyatiga ega bo‘ladi.

“Agar Enterprise Uzbekistan ma’muriyati kompaniyaga nisbatan noto‘g‘ri qaror qabul qilsa ham, kompaniya bu qaror ustidan mustaqil sudga shikoyat qilishi mumkin.”

Ayni paytda Enterprise Uzbekistan yurisdiksiyaning amaliy faoliyatini tartibga soladigan qator normativ hujjatlar, qoidalar va mexanizmlarni ishlab chiqmoqda.

Muhimi, ushbu tizim biznes ishtirokisiz shakllantirilmayapti. Enterprise Uzbekistan kompaniyalar, investorlar va huquqshunos ekspertlarni yangi yurisdiksiyani yaratish jarayonida faol ishtirok etishga va o‘z takliflarini bildirishga chaqirmoqda.

“Bu ko‘pchiligingiz uchun ushbu loyihaning dastlabki shakllantiruvchilaridan biri bo‘lish imkoniyatidir.”

Farhod Ibragimov Enterprise Uzbekistan faoliyati kelajakda manfaatli bo‘lishi mumkin bo‘lgan kompaniyalarni o‘z fikr-mulohazalari, jumladan, yuridik jamoalarining takliflari bilan o‘rtoqlashishga chaqirdi. Ushbu yondashuv yurisdiksiyani xalqaro biznes ehtiyojlariga imkon qadar mos va amaliy qilishga qaratilgan.

U bu tamoyilni IT Park Uzbekistanning so‘nggi o‘n yillikdagi rivojlanish tajribasi bilan bog‘lab, tashkilot faoliyatida kompaniyalarning ehtiyoj va fikrlarini muntazam tinglash muhim rol o‘ynaganini ta’kidladi.

“Biz doimo o‘zimiz jalb qilmoqchi bo‘lgan kompaniyalarni tinglaymiz. Va ularning fikrlaridan kelib chiqib, ko‘plab hujjatlar va mexanizmlarni ishlab chiqamiz.”

Farhod Ibragimov ishtirokchilarni aynan hozir, tizim hali shakllanish jarayonida ekanida, murakkab savollarni berish, kamchiliklarni ko‘rsatish va ochiq fikr bildirishga chaqirdi.

“Iltimos, muloyim bo‘lishga urinmang. Bizga noqulay savollar bering.”

U dastlabki bosqichda bildiriladigan fikr-mulohazalarning ahamiyatini quyidagicha izohladi:

“Hozir bu taklif bo‘ladi. Uch yildan keyin esa u shikoyatga aylanishi mumkin.”

Shu ma’noda, Enterprise Uzbekistan nafaqat texnologik biznes uchun yangi huquqiy muhit, balki undan kelajakda foydalanadigan kompaniyalar, investorlar va ekspertlarning fikr-mulohazalari asosida birgalikda shakllantirilayotgan yurisdiksiya sifatida rivojlantirilmoqda.

🔥 Jonli efirga ulanish: YouTube

Telegram | Instagram | Facebook | Youtube | LinkedIn