У Смаргонскім музеі адкрылася выстава “Археалагічныя адкрыцці Крэва”

У Смаргонскім гісторыка-краязнаўчым музеі дэманструецца выстава “Археалагічныя адкрыцці Крэва: Знаходкі з замку, гарадзішча і мястэчка”, падрыхтваная сумесна з Інстытутам гісторыі НАН Беларусі. Як адзначыў вядучы навуковы супрацоўнік Інстытута гісторыі НАН Беларусі Алег Дзярновіч, на выставе прадстаўлены знойдзеныя археолагамі артэфакты з розных аб’ектаў на тэрыторыі Крэва. Экспанаты прадстаўлены ў трох групах.

На выставе дэманструецца архітэктурна-будаўнічая кераміка замка, у тым ліку складанапрафіляваная цэгла нэрвюраў скляпенняў Княжацкай вежы і новаадкрытай Трэцяй вежы. Тут таксама прадстаўлены інструменты будаўнікоў Крэўскага замку XIV ст. – кельмы крэўскіх майстроў.
 
Багаты набор артэфактаў з Крэўскага гарадзішча рэпрэзентуе рамёствы і элітарную культуру жыхароў гэтага паселішча раннеўрбаністычнага тыпу ХІІІ – пачатку XIV стст. Прыцягвае ўвагу фрагмент прасліца, вырабленай з оўручскага шыферу – на ім можна разглядзець наяўнасць паўсцёртага надпісу. Упершыню ў музейнай прасторы выстаўлена накладка з Ліможскімі эмалямі пачатку ХІІІ ст. Такая знаходка – вельмі рэдкая ва ўсёй Усходняй Еўропе.
 
У 2024—2025 гг. у Крэва была знойдзена ганчарная майстэрня XVII cт. Вырабы і нарыхтоўцы майстры прадстаўлены на выставе. Увагу прыцягваюць традыцыйныя крэўскія свісцёлкі, вядомыя пад назваю “кукуці”. Археолагі знайшлі вырабы сярэдзіны XVII cт., але падобныя былі свісцёлкі-кукуці вядомыя ў Крэва і ў ХХ ст. Свісцёлкі вырабляліся як у выглядзе птушачак, так і вершнікаў на конях.
 
Упершыню на выставе прадстаўлены таксама арабскія дзірхамы Х ст. знойдзеныя ў ваколіцах Крэва. Гэтую калекцыю манет можна лічыць трэцім Ракавецкім скарбам.
 
Выстава ў Смаргонскім музеі будзе адчынена да канца жніўня 2026 г.