​Смартфон хотирасидаги қайси папкаларда фойдаланувчи файллари жойлашган?

Android бу - файл тизимига эга бўлган операцион тизим. Файл тизимида турли хил файллар, шу жумладан расмлар, видео ва аудио ёзувлар, архивлар ва папкалар мавжуд.
Масалан, сиз расмларни Галерея иловаси ёрдамида кўришингиз мумкин. Агар сизга расм, видео, мусиқалар ва бошқа файлларни ташқи хотира ёки компьютерга кўчириш керак бўлиб қолсачи?

Бундай ҳолатларда сиз смартфоннинг ўзида ўрнатилган файл менежеридан фойдаланишингиз мумкин. Агарда ўрнатилмаган бўлса, Google Play Маркетда файл менежерларидан бирортасини юклаб олинг (масалан ASTRO File Manager).

Смартфон хотираси икки қисмдан иборат: бири ички хотира (қурилма хотираси), иккинчиси - бу фойдаланувчи томонидан ўрнатилган ташқи хотира картаси (флешка).
Замонавий смартфонларнинг ички хотира ҳажми катта бўлганлиги сабаб, кўпчилик ташқи хотира картасини ўрнатмайди.

Ички хотирада тизим, илова, ўйинлар ва фойдаланувчи маълумотлари (расм ва видео, мусиқа ва ҳ.к.з) сақланади, ташқи хотирада эса асосан смартфон камерасида олинган расм ва видеолар (агарда керакли созлама ёқилган бўлса).

Одатда фойдаланувчи маълумотлари, тизим томонидан автоматик яратилган қуйидаги папкаларда жойлашади:
- DCIM папкаси. Смартфон камерасида олинган барча расм ва видеолар ушбу папкада сақланади. (Баъзи смартфонларда скриншотлар ҳам)
- Bluetooth папкаси. Номидан маълумки Bluetooth орқали қабул қилинган файллар сақланади.
- Download папкаси. Бу ерда интернет браузердан юклаб олинган ҳар хил турдаги файллар жойлашган.
- Movies, Music, Pictures, Video. Бу шахсий медиа файлларингизни сақлаш учун мўлжалланган папкалар. Масалан, Telegram иловасидан сақланган mp3 файллар Music, расмлар Pictures папкасида сақланади.
- SHAREit папкасида шу номдаги иловадан қабул қилинган ҳар хил турдаги файллар жойлашган.
- Шунингдек иловаларнинг номи билан номланган папкалар ҳам мавжуд. Масалан, Call Recording папкасида қўнғироқлардаги суҳбатдан ёзиб олинган аудио файллар, Sounds папкасида диктофон иловасида ёзилган аудио файллар жойлашган.

Кўпчиликни қизиқтирадиган савол - контакт, СМС, ўрнатилган иловалар қаерда сақланади?
Албатта улар ҳам ички хотирада сақланади, лекин ушбу файлларни кўчириб олиш учун фақат файл менежерининг ўзи етарли эмас. Махсус иловалар ёрдамида қўшимча файлларни ҳам нусхалашингиз мумкин. Масалан Super Backup & Restore иловаси.

Юқорида мисол келтирилган фойдаланувчи файллари жойлашган папкалардан ташқари, тизим ва қўшимча иловалар томонидан яратилган кўплаб папкалар ҳам мавжуд.
Баъзилар, нотаниш номдаги папкаларни ўчиришни одат қилишган, маслаҳатим нотаниш папканинг нималигини аниқ билмасдан ўчирманг, айниқса Android папкасини.

#маълумот