​Иккита SIM-картали смартфонлар ҳақида нималарни билишингиз керак

Иккита SIM-картали смартфонлар икки хил оператордан (масалан, бири интернет, иккинчиси қўнғироқлар учун) ёки шахсий ва иш учун алоҳида рақамлардан фойдаланадиганларга жуда қулай.
Бундай смартфонни сотиб олаётганда, алоқа сифати ва унинг имкониятларига катта таъсир кўрсатадиган баъзи хусусиятларни билишингиз керак.

DSDS ёки DSDA — қайси бирини танлаш керак?
Иккита SIM-картали смартфонлар DSDS ёки DSDA технологиялардан бирини қўллаб-қувватлаши мумкин.

DSDS (Dual SIM Dual Standby) — Ушбу технологияда иккала SIM-карта ҳам ишлайди, аммо улардан фақат биттасидан фаол фойдаланиш мумкин. Масалан, биринчи SIM-картага қўнғироқ қабул қилинганда, иккинчи қўнғироқларни қабул қила олмайди. Иккинчи SIM га қўнғироқ қилишга уринаётган бошқа фойдаланувчилар, абонент вақтинча мавжуд эмаслиги ҳақида хабар олишади.
Ушбу муаммо қўнғироқни йўналтириш (переадресация) функцияси билан қисман ҳал қилинади, яъни, SIM2 орқали қабул қилинган қўнғироқлар SIM1 га йўналтирилади. Йўналтирилган қўнғироқлар оператор томонидан чиқиш қўнғироғи сифатида баҳоланади.
Шунингдек, баъзи смартфонларда биринчи SIM-карта 2G/3G/4G режимларида (интернет+қўнғироқлар учун) ишлаcа, иккинчиси фақат 2G (қўнғироқлар учун) ишлаши мумкин. Бундай чекловларнинг сабаби иккала SIM-карта учун битта радиомодул ўрнатилганлиги.
Юртимизда сотилаётган смартфонларнинг аксарияти DSDS технологиясида ишлайди.

DSDA (Dual SIM Dual Active) — Ушбу технология қўшимча радиомодули туфайли SIM-карталарнинг ишлашида чекловлар йўқ. Абонент бир вақтнинг ўзида иккала SIM-картадан қўнғироқларни қабул қилиши мумкин ва умумий алоқа сифати ҳам яхшироқ. Бироқ DSDA технологиясига эга смартфонларда батарея кўпроқ сарфланади ва бундай қурилмаларнинг нархи юқори бўлади.
DSDA технологиясида ишлайдиган смартфонлар йил сайин камайиб бормоқда ва асосан Хитой учун чиқарилган қурилмаларда учратиш мумкин. Билишимча, HTC, LG, Asus, Huawei ва Honor брендлари DSDA смартфонларни ишлаб чиқаришган.

Алоҳида ёки гибрид туридаги SIM-карта слотлари нимаси билан фарқланади?
Слотларнинг икки тури мавжуд: алоҳида SIM-карталар (иккита SIM-карта + хотира картаси учун) ва гибрид (иккита SIM-карта ёки SIM ва хотира картаси учун).
Аксарият смартфонларда иккинчи вариант тез-тез учрайди. Агарда иккита SIM-карта ва хотира картасидан (microSD) бирданига фойдаланишни кўзлаган бўлсангиз, унда алоҳида SIM-карталар ва хотира карта слотига эга смартфонни танлашингиз керак бўлади.

Яқин келажакда барча смартфонлар битта сим карта ва eSIM (eSIM-карта нима?) модули билан ишлаб чиқарилиши мумкин. Ҳозирда асосан флагман смартфонларда eSIM технологияси ёрдамида қўшимча SIM-картадан фойдаланиш мумкин.

Савол: Иккала SIM-картаси бирданига ишлайдиган (DSDA) қайси смартфонларни биласиз?

#маълумот
____
Android смартфонлар учун дастурий хизматлар:
• 2 SIM картага ўгириш хизмати