Гольдштейн Комиын

Дона велӧдысьяс, пыдди пуктана ветеранъяс!

Став сьӧлӧмсянь чолӧмала тіянӧс уджвывса праздникӧн!

Миян республикаса школаясын уджалӧны ыджыд мывкыда, терпенньӧа, челядьӧс да ассьыныс профессия радейтысь матӧ 7 сюрс педагог.

Комиын школа тэчас сӧвмӧ воысь-во, челядь босьтӧны зумыд бур тӧдӧмлун. Ті повтӧг пырӧдчанныд асланыд уджын ӧнія технологияясӧ, выльмӧданныд-бурмӧданныд томуловӧс велӧданног, та дырйи вӧдитчанныд педагогикаса ветеранъяслӧн опытӧн да традицияясӧн.

Ми гӧрдитчам, мый быдмысь войтырлӧн эм позянлун школаын велӧдчигас на бӧрйыны водзӧ олӧмас нырвизь. Томулов босьтӧны тӧдӧмлун-сям кадет, психология да педагогика, медицина, асшӧр удж, инженерия, медиа, IT да агро классъясын. Комиын Сикт воӧ «Кадры в АПК» уджтас серти лоӧ восьтӧма нӧшта куим агротехнология класс.

Дона педагогъяс! Ми вылӧ донъялам регион сӧвмӧдӧмын пайнытӧ да унатор вӧчам, медым тіянлы уджавсис бура, а челядь велӧдчисны окотапырысь. Ми дзоньталам школаяс, ньӧбалам ӧнія кадся выль велӧдчан оборудование. Торъя тӧдчанлун сетам, мед видзны томуловӧс неминуча- ускӧттьӧысь, новлӧдлыны найӧс школаӧ выль автобусӧн шыльыд бур туйӧд. Велӧдан юкӧн век вӧлі да лоас миянлы зэв тӧдчана.

Аттьӧ тіянлы удж дораныд муслунысь да челядьӧс бурас ышӧдӧм-велӧдӧмысь. Буретш ті пуктанныд миян республикалӧн да ставнас страналӧн аскиа лунлы зумыд подув.

Сиа тіянлы крепыд дзоньвидзалун, уджын вермӧмъяс, мед велӧдчысьясныд аттьӧалісны бур тӧдӧмлунысь, а налӧн бать-мам отсасисны тіянлы челядькӧд уджын!

Коми Республикаын дона олысьяс! Пыдди пуктана ветеранъяс, ыджыд арлыда войтыр!

Миян лунпасын зэв тӧдчана октябрь 1 лунӧ ми шоныд бур кывъясӧн шыӧдчам ыджыд арлыда йӧз дорӧ, аттьӧалам найӧс мывкыдлунысь, терпенньӧысь да кыпыд олан руысь.

Ті быдторйын петкӧдланныд том йӧзлы пример. Ми гӧрдитчам, кутшӧм ыджыд удж вӧчинныд миян регионлы да страналы бур вылӧ. Ті сӧвмӧдінныд республиканымӧс – кыпӧдінныд каръяс, туялінныд-корсинныд мупытшкӧсса озырлун, сетінныд челядьлы эн сӧмын тӧдӧмлун, но и велӧдінныд-ышӧдінныд найӧс радейтны Войвыв, зумыда восьлавны олӧмас бӧрйӧм туйӧд.

Талун тіян вылӧ видзӧдӧмӧн ми донъялам семьялысь тӧдчанлунсӧ, кутчысям дзоньвидза оласногӧ, водзмӧстчам йӧзкӧд уджын.Торйӧн пасъя эзысь волонтёръясӧс, кодъяс отсасьӧны спецоперацияын служитысьяслы. Ті ставсӧ вӧчанныд кывкутӧмӧн, и быд лун эм мыйӧн миянлы нимкодясьны.

Ми вылӧ донъялам республикаын олӧм бурмӧдӧмӧ тіянлысь пайнытӧ да вӧчам став коланасӧ, медым аслыныд талун овсис лючки-бура.

Дона ёртъяс! Мед олӧмыс быд лун козьналас тіянлы выль позянлунъяс да аддзысьлӧмъяс. И водзӧ зільӧй-водзмӧстчӧй да кыпыд руӧн олӧй. Ті отсаланныд сӧвмӧдны республиканымӧс. И ӧтувъя командаӧн ми вӧчам сійӧс Россияын медбур регионъясысь ӧтиӧн.

Крепыд дзоньвидзалун тіянлы, матыссаясыд мед пыр вӧліны орччӧнӧсь, юр весьтаныд сӧстӧм енэж, кузь нэм да бур шуд!

Коми Республикаса пыдди пуктана воспитательяс, школаӧдз челядьӧс велӧдан тэчасын уджалысьяс!

Став сьӧлӧмсянь чолӧмала тіянӧс уджвывса праздникӧн!

Челядькӧд уджын тіянлы колӧ на дорӧ помтӧм муслун, мывкыдлун да терпенньӧ. Ті медводдзаясӧн вочааланныд найӧс ыджыд мирас, велӧданныд овны ӧтсӧгласӧн, мӧвпавны аскиа лунӧ видзӧдӧмӧн, нырччыны выляс, козьналанныд налы муслуннытӧ. Ті отсаланныд челядьлы водзӧ олӧмас подуласьны.

Миян ясли-садйӧ таво локтіс республикаын матӧ 38 сюрс зонпосни. Тіян дӧзьӧр-тӧждӧн налы сэні лӧсьыд, ставыс лючки-бур, и бать-мамлы нинӧмысь майшасьны.

Коми Республика гӧрдитчӧ тіянӧн. Аттьӧ, мый бӧрйинныд челядькӧд удж да зілянныд сетны налы тӧдӧмлунысь кындзи коланасӧ ёна унджык. Туйданныд-ышӧданныд найӧс радейтны Чужан му, пыдди пуктыны этнокультура. Миян зонпосни велӧдӧны коми кыв, тӧдмасьӧны республикаса историяӧн да традицияясӧн. Налы котыртӧма и кадет группаяс.

Детсадъясын инфраструктура сӧвмӧ-бурмӧ воысь-во. Мӧйму вӧлі заводитӧма кыпӧдны Кулӧмдінын 900 кагалы детсад. Комиын Сикт воӧ Ыбын воссис выльмӧдӧм татшӧм учреждение. Госэкспертиза став колана документсӧ бур боксянь донъялӧма да, капремонт шуӧма вӧчны нӧшта 20 детсадйын.

Став вермӧм саяс – тіян быдлунъя зільӧм-водзмӧстчӧм да бур традицияяс, кодъяслы подувсӧ пуктӧмаӧсь школаӧдз челядьӧс велӧдан тэчасысь ветеранъяс. И таысь найӧс торйӧн аттьӧалам.

Сиа тіянлы челядькӧд уджын помасьлытӧм вын-эбӧс, кыпыд ру, мед зонпосни окотапырысь нырччасны выляс-бурас, а бать-мамыс тшӧкыдджыка аттьӧаласны тіянӧс!

Коми Республикаса вужвойтырлӧн шылада-драмаа театр вылыс тшупӧд вылын петкӧдчис Белоруссия Республикаын "Белая Вежа" XXX-ӧд войтыркостса театральнӧй фестиваль вылын Александр Твардовскийлӧн поэма серти "Василий Тёркин" спектакльӧн.

"Белая вежа" театральнӧй фестиваль - нималана лоӧмтор, Беларусьын искусствояслӧн медтӧдчана форумъясысь ӧти. Сылӧн могыс – паськыда петкӧдлыны выль художественнӧй нырвизьяслысь панорама, а сідзжӧ кыдзи театр коллективъяс зільӧны видзны асланыс страна-войтырлысь традицияяс. Таво фестиваль программаын 31 спектакль 11 странаысь: Китай, Азербайджан, Армения, Болгария, Грузия, Казахстан, Кыргызстан, Монголия, Узбекистан, Беларусь, Россия.

Брест му вочааліс Коми театрса артистъясӧс шоныда да сьӧлӧмсяньыс. Прӧстӧй салдатлӧн историяыс, сылӧн помасьлытӧм оптимизмыс гӧгӧрвоана быд видзӧдысьлы. Брестса театрса залын вӧлі аншлаг. Спектакль помасьӧм бӧрын видзӧдысьяс клопайтісны сувтсӧн да горзісны «браво».

Беларусьын фестиваль дырйи лои кырымалӧма Коми Республикаса вужвойтырлӧн шылада-драмаа театр да Ленинскӧй комсомол нима Брестса академическӧй драма театр костын ёртасьӧм йылысь артмӧдчӧм. Сёрнитчӧмыс урчитӧ творческӧй уджъяс пыдісянь ӧтувтӧм, кыкнан театрлысь тӧдчана спектакльяс петкӧдлӧмӧн гастрольяса вежласьӧм.

Республикаын пыдди пуктана олысьяс!

Дона землякъяс!

Коми Республикаын, кыдзи и ставнас странаын, колис Ӧтув гӧлӧсуйтан лун. Аттьӧ ставлы, кодъяс пырӧдчисны бӧрйысьӧмас. Аттьӧ, мый тіянлы абу веськодь, кутшӧм лоас республикалӧн да страналӧн аскиа луныс.

Йӧзыс волісны бӧрйысян участокъясӧ семьяяснас, гӧлӧсуйтісны ӧтуввез пыр удж вывсяньыс.

Аттьӧ бӧрйысян комиссияясӧ пырысьяслы, гӧлӧсуйтӧм бӧрсяыс синйысьяслы, ставныслы, кодъяслӧн зільӧмӧн бӧрйысьӧмыс муніс восьсӧн да оланпас торкавтӧг.

Миян регионын гӧлӧсуйтісны зэв унаӧн – 51,27 прӧчентыс. Воддза бӧрйысьӧм дорсьыс тайӧ ёна унджык.

Республикаын олысьяс бӧрйисны Государственнӧй Думаса депутатӧ ассьыныс кандидатъясӧс. Ылӧсас на артыштӧм серти, медунаӧн сетӧмаӧсь гӧлӧснысӧ Россияса Герой, торъя военнӧй операцияса участник Станислав Вадимович Кочев дор.

Республика, кыдзи и ставнас страна, ошкис водзӧ олӧмас Россияса президентлысь нырвизьсӧ. Рытыввыв зыртчӧ, зільӧ быдногыс конъявны, но ми президент дор ӧтув сувтӧмӧн да Победа дорӧмӧн кутчысям зумыда.

Миянлы колӧ зэв на уна удж вӧчны, медым регионным дзоридзаліс. Госдумаын асланым йӧзкӧд кутам водзӧ бурмӧдны Комиын олӧмсӧ. Эска, миян ставыс артмас!

Коми Республикаса вöр комплексын пыдди пуктана уджалысьяс! Дона ветеранъяс!
 
Сьöлöмсянь чолöмала тiянöс Вöрын уджалысь лунöн!
 
Парма-ягыс – миян республикаса озырлун, мыйöн ми гöрдитчам, да экономикаса тöдчана юкöн. Комиын вöр заптан делянкаяс Россияса Европа войвылын медбурöсь.
 
Миян мог – тöлкöн вöдитчыны тайö озырлуннас, видзны да водзö быдтыны коми пармасö. Та могысь ми уна вöчам: вöр овмöсöн вöдитчöмысь водзöс босьтöмнас миян республика странаса Рытыв-Войвылын медводдза да Россияын витöд местаын.
 
Регионса предприятиеяс вöчöны зэв бур прöдукция, сы лыдын тьöс-плака да фанера, целлюлоза да ломтысян пеллет. Таво помалöма «Лузалес» компанияын производство вынйöр ёнмöдан удж. Республикаын збыльмöдсьö инвестицияа нöшта куим проект: «Сыктывкарса вöр пилитан да обработайтан комбинатын», «Промтех-инвест» да «Печора Север Лес» компанияясын.
 
Парма-яглы лёк вöчöмысь видзчысьöм могысь ми вöдитчам öнiя техникаöн, спутникъясöн да авиацияöн. 2026 воын войвыв угоддьöяс бöрся видзöдны босьтчисны тшöтш Усинскын да Интаын авиаотделениеяс.
 
Тiян зiльöмöн, вын-эбöсöн да кывкутöмöн вöр комплексын уджыс бурмö воысь-во. Аттьö тiянлы профессия  дораныд муслунысь, ыджыд сямысь. Сиа ставныдлы крепыд дзоньвидзалун, семьяясыдлы быд бурсö да уджын вермöмъяс!

Коми Республикаса мусир да биару промышленносьтын пыдди пуктана уджалысьяс да ветеранъяс!

Пӧся чолӧмала тіянӧс уджвывса праздникӧн!

Войвылын мусир да биару перйыны абу кокни. Но уна дас сюрс мортлӧн ӧтув зільӧмӧн мусир да биару промышленносьт гырысь ӧдӧн сӧвмӧ воысь-во. Углеводород куйлӧдыс содӧ, мупытшкӧсса озырлун перйысьяс вӧдитчӧны ӧнія технологияясӧн. Ставыс тайӧ отсалӧ регионлы сӧвмыны да зумыда водзӧ восьлавны. И ышӧдӧ миянӧс гӧрдитчыны Коми Республикаӧн да татчӧс йӧзӧн!

Мусир да биару промышленносьт отсалӧ оз сӧмын экономика сӧвмӧдны, но и республикаын олӧм бурмӧдны. Ломтас перъян предприятиеяс важысянь нин ёртасьӧны миян регионкӧд социальнӧй юкӧнын. Ми ӧтув дзоньталам велӧдан, культура да дзоньвидзалун видзан учреждениеяс, бурмӧдам-мичмӧдам кар-сиктса уличаяс да уна йӧза шойччанінъяс. Ыджыдысь-ыджыд аттьӧ мусир да биару компанияяслы социальнӧй юкӧн вӧсна кывкутӧмысь да регионын олӧм бурмӧдӧмӧ тӧдчана пай пуктӧмысь.

Торйӧн аттьӧала ветеранъясӧс, кодъяс выннысӧ жалиттӧг уджалісны, кыпӧдісны да сӧвмӧдісны регионса да странаса мусир да биару комплекс. Талун ми вермам нин шуны, мый Войвыв – Россиялӧн зумыд тыл.

Аттьӧала мусир да биару промышленносьтын уджалысьясӧс, ставнысӧ, кодъяс зільӧны республикаса прӧмыселъясын, радейтӧны профессиянысӧ да кӧленаысь кӧленаӧ вуджӧдӧны сы дорӧ муслуннысӧ.

Став сьӧлӧмсянь сиа крепыд дзоньвидзалун, шуд, быд бурсӧ тіянлы да матыссаясыдлы! Коми Республикалы да Россиялы бур вылӧ – выль вермӧмъяс! Праздникӧн!

Дона ёртъяс!

Ясли-садйӧ ветлысьяс, школаын велӧдчысьяс да студентъяс, педагогъяс да бать-мам!

Сьӧлӧмсянь чолӧмала тіянӧс Тӧдӧмлун лунӧн!

Выль велӧдчан во – миян олӧмын выль тшупӧд. Челядь да том йӧз кутасны босьтны тӧдӧмлун, туясьны да вермӧмъяс шедӧдны. Зэв тӧдчана тайӧ луныс и педагогъяслы да бать-мамлы.

Ми гӧгӧрвоам, мый талунъя ныв-зон сайын – миян регионса да ставнас странаса аскиа луныс. Коми Республикаса команда вӧчӧ ставсӧ, медым миян челядьлӧн вӧлі позянлун бура велӧдчыны. Ми кыпӧдам да выльмӧдам-дзоньталам школаяс, детсадъяс, вузъяс, колледж-техникумъяс, восьталам выль мастерскӧйяс, ньӧбалам ӧнія кадся оборудование.

2025 воын Усинскса 4-ӧд номера школаын восьтӧма челядьлы «Кванториум» технопарк. 19 школаын да Сыктывкарса лесопромышленнӧй техникумлысь общежитеын вӧчӧма капремонт. Таво помалам капитальнӧя дзоньтасьны Сыктывдінысь Ыб сиктса детсадйын, выльмӧдам нӧшта 22 велӧдчанін. 222 школаын музыка, серпасасян искусство да физика кабинетъясын томулов кутасны вӧдитчыны ӧнія кадся оборудование-аппаратураӧн. Комиын Сикт воӧ регионын воссис кык агрокласс – Леткаын да Паджгаын.

Пыдди пуктана велӧдысьяс! Тіян уджныд донъявны позьтӧм. Ті нуӧданныд челядьӧс тӧдӧмлун босьтан туйӧд да отсаланныд налы сӧвмӧдны енбисӧ. Тіян зільӧм-водзмӧстчӧмӧн воысь-во содӧ ЕГЭ-ысь 100 балл да медаль босьтысьыс. Аттьӧ тіянлы профессиянытӧ радейтӧмысь, мывкыдлунысь да терпенньӧысь.

Дона бать-мам! Ті бара, но челядьныдкӧд нин ӧтлаын пуксянныд парта сайӧ. Пыр кутӧй тӧд выланыд, томуловлы колӧ тіянсянь гӧгӧрвоӧм да отсӧг. Лоӧй налы бур ёртъясӧн!

Дона челядь! Водзын тіянӧс виччысьӧ яръюгыд лоӧмторъясӧн озыр велӧдчан во. Ті тӧдмаланныд уна выльтор, пырӧдчанныд выль проектъясӧ. Оз ло кокни, но ставыс, мый босьтанныд велӧдчиганыд, ковмас водзӧ олӧманыд. Сиа тіянлы быд бурсӧ!

Республикаын пыдди пуктана олысьяс!

Дона горнякъяс! Шахтёр-ветеранъяс!

Став сьӧлӧмсянь чолӧмала тіянӧс уджвывса праздникӧн – Шахтёр лунӧн!

Горняклӧн уджыс зэв сьӧкыд. Сылы колӧ бур тӧдӧмлун да ыджыд сям, зумыдлун да повтӧмлун. Шахтёръясӧс миян странаын да Коми Республикаын олысьяс пыдди пуктӧны да вылӧ донъялӧны.

Ми гӧрдитчам наӧн, кодъяс асланыс профессия серти уджалӧны пыдын му улын, да зілям вӧчны став коланасӧ, медым найӧ вермисны бура овны да шойччыны. Кар-районын медтӧдчана предприятиеяскӧд тшӧтш выльмӧдам социальнӧй стрӧйбаяс да дзоньталам туйяс, мичмӧдам-пелькӧдам уна йӧза шойччанінъяс, олан керка ӧшинь увъяс, ӧтувъя командаӧн отсалам горнякъяслы збыльмӧдны налысь быдлунъя тӧжд-мог.

Аттьӧала тіянӧс сьӧкыд да миян регионса экономикалы сэтшӧм тӧдчана уджысь, код сайын абу сӧмын Коми Республикаын, но и ставнас Россияын бур олӧмыс. Торйӧн аттьӧала горняк-ветеранъясӧс. Тіян вермӧмъясныд век кутасны ышӧдны шахтаын зільысьясӧс бура уджавны, ассьыныс профессиясӧ радейтны. И таӧ эскӧдӧны горняк династияяс, ӧд буретш на вылын зумыда кутчысьӧ из шом перъян юкӧныс.

Сиа став горняклы крепыд дзоньвидзалун, уджын вермӧмъяс да аскиа лунӧ эскӧм! Мед гортаныд пыр вӧлі кыпыд, югыд да шоныд, а матыссаясыд – шудаӧсь!

Сентябрь 10 лунӧ восьса эфирын «веськыд йитӧда» пресс-конференция дырйи вочавидза республикаын олысьяслӧн да журналистъяслӧн юалӧмъяс вылӧ.

Видзӧдны-кывзыны позяс «Юрган» да «Коми гор» телеканалъясын, а сідзжӧ ӧтуввезйын «ВКонтактеын».

Эскӧда, ни ӧти юалӧм-шыӧдчӧм оз коль видлавтӧг да вочакывтӧг. Миянлы зэв тӧдчана кывзыны йӧзӧс да кывны найӧс. И буретш «веськыд йитӧд» сетӧ та могысь позянлун.

Республикаын пыдди пуктана олысьяс!
Дона землякъяс!
Чолӧмала тіянӧс Коми Республикалӧн чужан лунӧн!

Миян регионлы тырӧ 105 во. Тайӧ лыдпас саяс – уна кӧленалӧн зільӧм, медым миян войвыв муным лоис вына.

Миян республикалӧн историяыс – тані олысьяс, налӧн чужан кыв, вежавидзан да зумыд олан этш. Коми – уна сикас национальносьта республика, и таын сылӧн вынйӧрыс. Тані орччӧн олӧны уна сикас войтыр, налӧн быдӧнлӧн аслас культура да традицияяс, но ӧта-мӧд костын топыд йитӧдыс ӧтувтӧ миянӧс ставнымӧс.

Врачьяс да педагогъяс, стрӧительяс да туй вӧчысь-дзоньталысьяс, кӧр видзысьяс да видз-му вӧдитысьяс, промышленнӧй предприятиеясын зільысьяс – ті асланыд уджӧн сӧвмӧданныд республиканымӧс лунысь-лун. Буретш ті – Коми Республикаса медыджыд озырлуныс, мыйӧн ми гӧрдитчам.

Тіянкӧд ӧтлаын Коми Республикаса командаын ми водзӧ сӧвмӧдам дзоньвидзалун видзан да велӧдан юкӧнъяс, бурмӧдам туйяс, збыльмӧдам национальнӧй проектъяс. Вӧчам став коланасӧ, медым том йӧз эскисны республикалӧн югыд аскиа лунӧ да кольччисны татчӧ овны-уджавны.

Дерт, миянлы зэв на уна колӧ вӧчны, но ӧтув зільӧм-водзмӧстчӧмӧн, ӧтувъя командаӧн миян ставыс артмас.

Ме сьӧлӧмсянь аттьӧала Комиын став олысьсӧ чужан му дорӧ муслунысь, бур уджысь, регион вӧсна тӧждысь.

Сиа тіянлы дзоньвидзалун да быд бурсӧ! Миян радейтана Коми Республикалы – сӧстӧм енэж да сӧвмыны-дзоридзавны! Праздникӧн!

Коми Республикаса стрöитчан юкöнын пыдди пуктана уджалысьяс да ветеранъяс!
 
Сьöлöмсянь чолöмала тіянöс Стрöитель лунöн!
 
Таво миян страна пасйö тайö праздниксö 70-öдысь. Тайö лунö ми нимöдам ставнысö, кодъяс бöрйисны йöзлы зэв тöдчана профессияясысь öтиöс. Ті вöчанныд  кывкутана сьöкыд удж, пуктанныд регионса экономика да социальнöй юкöн сöвмöдöмö ыджыд пай. Ті стрöитанныд каръяс, кыпöданныд выль олан керкаяс, нюжöданныд туйяс, мед республикаын  йöзлы овсис лöсьыда да бура. Ветеранъясöн пуктöм традицияяс вылö подуласьöмöн талун стрöительяс повтöг босьтчöны выль технологияясö. Та дырйи зэв тöдчана туйдны-велöдны тайö  уджас том йöзöс.
 
2026 воын Сыктывкарын медводдзаысь вöлі «Том специалист – аскиа лунлы подув пуктысь» форум, коді нуöдсьö Россияса президент Владимир Владимирович Путинлöн индöд серти. Форумас пырöдчис 670-ысь унджык  морт –  йöзöс уджöн могмöдысьяс, педагогъяс, студентъяс да школаын велöдчысьяс.
 
Пыдди пуктана стрöительяс! Ми гöрдитчам профессияаныд тіян бур тöдöмлунöн да ыджыд сямöн. Аттьö тіянлы  удж дораныд  муслунысь! Ті, кыдз Коми Республикаса ыджыд команда юкöн, пуктанныд республикалöн аскиа лунö тöдчана пай, медым йöзлы окота вöлі тані овны да уджавны.
 
Сиа тіянлы дзоньвидзалун, семьяясныдлы шуд, мед рöдвужныд да матыссаясныд пыр вöліны орччöнöсь! Уджалöй водзö республикалы бур вылö, мед збыльмас став проектныд да планныд!

Коми Республикаын пыдди пуктана олысьяс!
 
Физкультура радейтысьяс, спортсменъяс да спортса ветеранъяс!
 
Сьӧлӧмсянь чолӧмала тіянӧс Физкультурник лунӧн!
 
Коми Республикаын спорт да физкультура – национальнӧй традиция юкӧн нин. Асывнас котралам, тӧвнас лыжиӧн да конькиӧн ислалам, гожӧмнас велосипедӧн журъялам – уналы тайӧ быдлунъя олӧмас зэв колана да тӧдчана. Талун регионын 63 прӧчент олысьыс пырӧдчӧ физкультураӧ.
 
Ми Коми Республикаса ыджыд командаӧн нырччам-венласям спортын вермӧмъяс вӧсна да зілям, медым регионын вӧлі физкультураӧн дзоньвидзалун ёнмӧдӧм могысь став позянлуныс.  Пыр тшӧкыдджыка республикаын нуӧдсьӧны федеральнӧй тшупӧда ордйысьӧмъяс, а миян спортсменъяс босьтӧны медся нималана ордйысьӧмъясын медальяс.
 
Воысь-во миян кар-сикт-посёлокъясын олысьяслы тренируйтчӧм могысь воссялӧны выль спортзалъяс да площадкаяс, выльмӧдсьӧны спорт стрӧйбаяс. Таво республикаын «Коми гожӧм» проект весьтӧ мынтысьтӧг позьӧ тренируйтчыны опыта наставникъяслӧн веськӧдлӧм улын.
 
Сиа ставныдлы крепыд дзоньвидзалун, сӧстӧм енэж да олӧманыд быд бурсӧ! Ас вынӧ эскӧмӧн да зільӧмӧн шедӧдӧй   спортын выль гырысь вермӧмъяс!

Комиын виччысьӧны «Культураын земскӧй уджалысь» программаӧ пырӧдчысьяссянь содтӧд шыӧдчӧмъяс.
 
Июль 28-ӧдсянь сентябрь 25 лунӧдз Коми Республикаса культура да архивын удж кузя министерствоын виччысьӧны 2026 воӧ «Культураын земскӧй уджалысь» федеральнӧй программаӧ пырӧдчӧм могысь шыӧдчӧмъяс.
 
Тайӧ уджтасыс збыльмӧдсӧ 2025 восянь Россияса президент Владимир Путинлӧн индӧд серти. Вынсьӧдӧма сійӧс специалистъясӧс 50 сюрс да этшаджык олыся кар-сиктса культура керкаясын уджавны локны ышӧдӧм могысь.
 
Таво такӧд йитӧдын 18 вермысьлы шуӧма вичмӧдны 1 миллион шайтӧн. Быдӧн вермас видзны тайӧ сьӧмсӧ ас кӧсйӧм сертиыс. Программаас пырӧдчыны позьӧ кӧть кутшӧм арлыдӧн. Сьӧмсӧ мынтасны, специалистыс кӧ культура учреждениекӧд кырымалӧм сёрнитчӧм серти уджалас сэні этша вылӧ 5 во.
 
Уджтасас пырӧдчӧм могысь став юӧр-документсӧ йӧзӧдӧма Коми Республикаса культура да архивын удж кузя министерстволӧн официальнӧй лист бокын. Юасьны позьӧ 8 (8212) 255-484 телефон пыр.