АЛИШЕР ТӮХТАЕВ: МО БАҲРИ НИШОН ДОДАНИ НАТИҶАҲОИ ХУБ ТАЛОШ МЕКУНЕМ!

🔹 Нисфирӯзии 16 октябр дар меҳмонхонаи "Marriott"-и Кувайт сармураббии дастаи "Регар-ТадАЗ" Алишер Тӯхтаев дар нишасти матбуотии пеш аз бозиҳои марҳилаи гурӯҳи "С"-и Лигаи даъвати КФО-2026/27 иштирок карда, андешаҳои худро чунин баён кард:

- Тайёриҳои мо ба мусобиқа хуб гузашт. Айни замон мо таваҷҷуҳи асосиро ба бозии якум равона намудем. Мекӯшем то даври гурӯҳиро бо натиҷаҳои хуб ҷамъбаст карда, дар раддабандии бошгоҳии КФО ба хазинаи Тоҷикистон имтиёз биёрем ва мухлисони худро шод намоем.

🔹 Сипас Алишер Тӯхтаев ба саволҳои хабарнигорон посух дод.

- "Регар-ТадАЗ" ҳоло садрнишини мусобиқаи дохилист. Дар Лигаи даъват чӣ ҳадафҳо доред?

- Албатта, мо имсол дар арсаи мусобиқоти дохилӣ ҳунарнамоии хуб дорем, аммо Лигаи даъвати КФО аз чемпионати мо фарқ дорад. Ин ҷо дар 7 рӯз бояд 3 бозӣ гузаронем. Инчунин обу ҳаво низ тафовут дорад. Қатъи назар аз ин, мо баҳри расидан ба ҳадафҳои баланд талош мекунем.

- Ҳоло чӣ мушкилиҳои кадрӣ доред?

- Тақрибан мушкилии ҷиддии кадрӣ надорем.

- Дар бораи рақибонатон чӣ гуфта метавонед?

- Мо дар бораи онҳо маълумот дорем. Ин ҷо дар Кувайт гурӯҳи хубе ҷамъ шудааст. Умедворем, ки пагоҳ қадами бобароре ба мусобиқа гузошта, мухлисонро шод мекунем.

🔹 Дар охир сармураббии даста ҳамаи ҳамватанонамонро барои мухлисӣ ва дастгирии тими "Регар-ТадАЗ" дар арсаи байналмилалӣ даъват намуд.