Sehrli tabletka

Insonning fikrlash darajasi qancha primitiv bo'lsa u harakatlarining natijalarini shuncha tez xohlaydi. Bitta narsa qilsada darrov natija bo'lsa. Tezda boyib ketish, vazn yig'ish va tashlash, hayp orqali ko'tarilib olish , 2 oyda ingliz tili(yoki dasturlash)ni o'rganib olish shular jumlasidan.

Dunyoqarashi keng va tajribali odamlar esa yuqori natijalar tez kelmasligini bilishadi. Katta natijalar bir martalik ish emas, balki har kunlik kichik qadamlar seriyasi ekanligini ular tushunib yetishgan.

Hech qayerda, hech kimni har kunlik zerikarli takrorlanuvchi jarayonlar qiziqtirmaydi. Chunki ular juda oddiy: Doimo o'qib o'rganish, va'dalarni bajarish, halol bo'lish, o'z ustida ishlash. Zerikarliku juda a? Ko'pchilikka bu ssenariy yoqmaydi, qani endi bir sirni yoki hech kim bilmagan ma'lumotni bilib olsa-da, birdaniga ko'tarilib ketsa. Yoki muvaffaqiyatli bir odamga shogird tushib, baxtini topsa.

Sen unday bo'lma. Har kunlik vazifalaringni bajarib boraver. Natija o'zi kelaveradi.

O'qigan kitoblaringni foydasi ertasiga emas, yillar o'tib tegishi mumkin, lekin buning uchun har kuni o'qish kerak.

Ingliz tilini 6 oyda o'rganishni emas, har kuni 1 soat shug'ullanishni maqsad qilib qo'y

Blogingni 12 yarimta odam o'qisa ham yozaver, sen fikrlashing o'sishi uchun yozasan, mashhur bo'lish uchun emas.

Jismoniy mashg'ulotlar va ovqatlariningga e'tibor ber, 40 yoshli o'zing rahmat deydi.

Har kuni kimgadur yaxshilik qil. Zero yaxshilikning mukofoti faqat yaxshilikdir

Va nihoyat, har kuni o'rganganlaringdan bir donasini olib hayotga tadbiq qil, 1 yilda boshqa odam bo'lasan. Sinovdan o'tgan.

P.S.

Alloh ham insonlarda bitta katta amalni emas, har kunlik kichik amallarni yaxshi ko'radi. Shuning uchun bu dunyoda Hoji aka larning obro'si baland bo'lsa ham, oxiratda so'rov namozdan boshlanadi.