- ХIуни набзи селра хIебурес рируд, - гъай чехиб мурулла иличи. - Я бурили хIяжатдеш хIебургар. ХIуникIун бархьдеш хIебурид?
ГIяйшат жаваб чарбарес къалабахIерикиб. Илизиб гъайрухъес ахърира калунсигъуна ахIенри, хамха гьунарагарбиублири, лерилра цIакьани хапли кадерхурсигъуна хIяйчирри. Се рикIусири ил гьанна муруйзи? АхIен, илгъуна хIебиуб или, нагIядаллагь рикIнилизибад, къянала хъями-цIама риркьнилизибад се гIяхIдеша? Мурул абдал тIакьа axIeн. Къалпли дурабулхъуси илала гьигьра бала. Бурушларад хапрарили ца ити дуцIрумла дуги чебаахъес ил ила хIеки.
- Бархьси саби, - илала арилизирад духъунтиван, кIунтIби шивкIивдухъун.
ГIyp илис муэрлизибван ит бехIемцI гьанбикиб.
Мурул хIябал баз ялчнад вякьи хъулив аги. Ярга ахъес маза-масличи дуки рякьунсири. Къалабати чяхI-заб... ГIиникълизи дигIянрикни... Хапли илав колхозла жагьси букIун Батир дакIуухъни... гIyp биалли мexIyp хIяланала асарлиуб бекI жургъбухъни... Нагагь рируси риалри илини ит манзил гIелабяхI чарбарес…
- ГIyp хIела буреси лебу? - суал аргъиб илини.
ГIяйшат тирхьрухъун. «ГIyp хIела буреси лебу?» ибти дугьбани иличи кахси гьанбик хьурабариб: «ГIe, иша ну хIязлис кибси axIeнpa. Жамавли ну ишар каруршура. Ил чебкабурхутазивад axIeн. Белики, нугъуна цIахриубсилис, уряхIсилис, ламартчис илгъуна танбихI лайикьлира бургар? Сен ил набчи вайти дирглумачил вехIхIелзулира? Сен илини хIедирхъулира? HукIун илис цIакьли дигахъусири. Дигахъусири! Някъ белкъайчи дирхъуси виалри, илхIеликIун наб ребкIесра гьамадли бири…»
Селичи-дигара хIядурси ГIяйшатлис хIятта тамашабизур ил сягIятлизир сари вяв-чIярхIерикIули, бекIличирти гъезли къябхIерикIули, кьукьубачи рикили муруйзи бусравхIерикIули, паргъатли риъни. БебкIаличи хIерси илкьяйда сен уара?
- ... буреси лебу? - тикрарбариб Жамавли суал.
ГIяйшатли бекI ахъбуциб. ИлхIелицун илини чебаиб мурулла някълизиб цIацIабарибси тапанча. Сенрил илис тамашабизур: чула хъулиб ярагъ лебси ахIенри. Ил урхIла сабри. Се декIардеша, чила ва чинад биалра ил.
- Леб, - ахирра иб гIяшли ГIяйшатли.
- Бура хIед дигуси?
- Наб багьес дигахъира, сен-сен вецIну шура дусла гIергъи хIечи ил хабар баибал…
- Батирли буриб. ХIялалватахъес сунечи живарира…
- Аллагьли хIялалматаб сай! Иш гIиникълар ну бисали гIяндрикIухIели, илкIун ца Аллагьлира нушанира ахIи селра хIебала или, хъяма виркьусири. Ахират цIудар-цIябли баргаб сунени!
Илини биса тIашаиб ва хапли хьарбаиб:
- ХIуни ил хIялалватуррив?
- Ватурра.
- ХIебиалли, набчивадра чевкархуду?
- Юх.
- Ил бархьси саби. Амма багьи, ит бунагь набра вецIну шура дус бижгурси жаза сабри, я гIyp мурткIал тикрархIебиуб. XIy наб цайли ца левси, дигахъуси мурул адам сайри...
- ГIягIнили axIeн, ГIяйшат...
- ГIe, гьанна xIy набчи хIерхуд. Ну хIядурлира. Илала дурабадра, нуни балулра, гIyp xIy набчил хIериэс хIейруд. Се бариша цIахриубси наб дунъя? Я дурхIнала дяхIличи хIеррикIес хатир кали axIен. Мабирид набчи уркIецIи, Жамав! Хяван карушаба. Ну хIядурлира. Иргъулрив? ХIядурлира! Карушаба!
Илини, сунела хамхализи aтIec гIягIниси хIярхIя чехIебаэс дигухIеливан, хIулби чекайхьиб. Лерси мерличирад вяшхIерухъун.
Жамавли тапанча ахъбуциб.
Къяйкла тIамали дугила лехIдеш баргаиб.
ГIяйшатли сагали хIулби абхьибхIели, мурул вяхIгьавли сунела кьяшмала гьала кайкилри. Бацла шалалиуб илала бекIлизибад дурабулхъуси хIила рупIрупIи цIударли чебиулри…

#чтение