КЬУРЪАЙНИ ДУЧӀУТЕ УДЗБЕ

Кьуръайни дучӀуте удзбе,
ГӀямулте умъуте рудзбе,
Таджвидличал учӀуй гьарил
Сай талихӀла вегӀли убил.

Таджвид хӀегьурил гьар-кудил,
Урар лебил сикӀал пучил.
Кумекбаркьаб динла удзба,
Кьуръан делчӀаб дерхӀна, рурсба.

Аллагьла разидеш саби,
Кьуръа муръидеш иш саби,
Гьар идзайс дарманил саби,
Бусурмантас гьуни саби.

Идбаглини таджвид делчӀун,
ДжабрягIиллин делчӀахъун.
Кумекбаркьаб динла удзба,
Таджвид делчӀаб дерхӀна, рурсба.

Аллагьли ДжабрягIиллике,
ДжабрягIилли Расуллике,
Расуллини асхӀябтаке
Аманатдаркьиб гьаллике.

АсхӀябте лебилра балъун,
Датесил гьуни чус буун.
Кумекбаркьаб динла удзба,
Таджвид делчӀаб дерхӀна, рурсба.

АсхӀябтазерада касиб,
ЕрхӀелра кьариъли дуциб,
Нушаб гьунбе кедаахъиб,
Илдилис табтурте даркьиб.

Таджвид Кьуръа агьлу саби,
Алжанала чатӀне саби,
Дунъялизеб уръи саби,
Алжайзеб Бадз-БерхӀи саби.

Удзи-рудзи, ада-аба,
Кьуръа агьлуличал даба,
ГӀялимла хӀурмат багьаба,
ГIилмула кьадри баркьаба.

Таджвид керте сари дагьес,
Гьуни агвара хӀедагьес,
ГӀягӀниле саби делчӀахъес,
ДерхӀне лебил гьар бусурмайс.

Авъалра мазгьабла бухӀнаб,
Имамте бархбалъва цахӀнеб.
Кумек баркьаб динла удзба,
Таджвид делчӀаб дерхӀна, рурсба.

АлхӀям дурусле хӀебалле,
ДехӀиба кебла калъалле,
Сай кьалле илил йязихъле,
Аллагьла гьалав урудзле.

ДжабрягIил Кьуръайчал вакӀиб,
Расул цӀакьле кьакьаваркьиб,
УчӀен иле хъвячӀ-хъвячӀваркьиб,
ГӀур-гӀурра икьараъ белчӀен иб.

УчӀунил ахӀинра иле
Илада сай хъули гьавуб,
ДжабрягIилра гӀелавадле
Хадиджатличу сай ваиб.

Идбаглисра их буб иле,
ДерхӀнаке къаршибуциле,
МугӀяллимлизе бедиле
Лазимил сикӀал багъахъаб.

Таджвид, махрадж далахъуле,
Кьуръан дурусле бучӀуле,
Рукну, шартӀ дехӀибултела,
Иман, ислам муъминтела.

Сипатуне ца Аллагьла,
Идбагунела лебтаке,
Исмурте идбагунела,
Силсила устазунела.

Гьарил сикӀал дагьахъулле,
ЛукӀес хатӀра дяркъахъулле.
Камил баркьаб динла удзба,
Къайгъи баркьаб дерхӀна, рурсба.

Дагъистанлизеб агварил,
Гьанне сагале тӀинтӀбубил,
НигӀмат Аллагьлини гибил,
Пагьму адамтас бедибил.

Иншааллагь хабар бурар,
БерхӀи-берхӀилис тӀинтӀбурар,
Кьуръа агьлу имцӀабурар,
Уммиййуба камле бурар.

Дедза бахъаб ца Аллагьлис,
ДугӀя-аманат ГӀумарлис.
Кумекбаркьаб динла удзба,
Кьуръан делчӀаб дерхӀна, рурсба.