Гъапурли гӀямру деркӀибли,
ХӀала пучдиш хӀабиуру,
ХӀяри аркьянил балгьули
Ил хабар хӀат хӀабиуру?

УркӀи цӀударли, гъиз цӀубли,
Хабар ассис хӀулби цӀубли,
Бигу-бирханти гьарахъли
ХӀяри аркьян хӀабиуру?

Дунъя, мас ибли узули,
Мас букьуртали бурцули,
Ахирла бархӀи бирцули,
Ил ахӀмакьдиш хӀабиуру?

Иман, ислам хӀадалгьули,
ХӀярам-хӀялал хӀадиркӀули,
Бунагь миццдихь баркьибли,
ХӀула къагьдихь хӀабиуру?

ХӀябла ухӀна кархаттли,
ДекӀти гьангус чидалгалли,
Дахъил гӀянччи чикаалли
Ил цӀябдеш хӀат хӀабиуру?

Мункар, Накир хӀука бакӀалли,
Жаваб баркьара хӀайгьаттли,
ХӀу хӀябли кьакьаваркьаттли,
Ил гӀязаб хӀат хӀабиуру?

Ит кьиямала бархӀи
Аллагьла гьала икаттли,
ВяхӀ цӀударли хӀу кайзаттли,
Ил цӀахдиш хӀат хӀабиуру?

ХӀат умцанти кадихьалли,
Вайти-гIяхӀти дитӀакӀалли,
ГӀяхӀти гӀямулти кункдигьалли,
Иш шайки хӀат хӀабиуру?

Гьалжан-жагьаннаб дуртӀухӀали,
ГIяхӀтас гьалжан кьадарбалли,
ХӀат гьалжан хӀабалгъанни,
Ил вайдиш хӀат хӀабиуру?

Ай мискин чарх, хӀацци викӀус,
Ишди дугьби хӀуни аргъа,
Жагъаннаблизи хӀу укаттли,
БуцӀардиш хӀат хӀабиуру?