СЕЦАДХӀИ САБУР БИРКЬИДА ЦӀАЛИЗИБ?

Дунъя гьанни, ахират гьанагарли,
Мас гьанни, гьалжан хабарагарли,
Мискин гъапулли, бебкӀа гьанагарли,
СецадхӀи сабурбиркьида цӀализиб?

Пякьир вахъ иман агарли айзадли,
ХӀекьсилизивад гӀелавяхӀ айзадли,
Ахиратличи къакъгьавли айзадли,
СецадхӀи сабур биркьида цӀализиб?

ВяхӀили леври кьалли дунъя бучес,
ХӀяблизи дахъал бунагьуни духес,
Хамха гӀязабхӀеберкӀили хӀебатес,
СецадхӀи сабурбиркьида цӀализиб?

ХӀяблизир хӀябра гӀяла-гъажа диэс,
ГӀяхӀси гӀямал ахӀи дарман хӀебиэс,
Илабил пашмандеш заяли биэс,
СецадхӀи сабур биркьида цӀализиб?

Мискин, бунагьи дирцили хӀебкӀадли,
ГӀямру заяли деркӀили вебкӀадли,
Иш дунъяли виргӀили уваргадли,
СецадхӀи сабур биркьида цӀализиб?

Курла бухъяндеш, иш дунъяла къантӀдеш,
ЧебхӀебиркуси бебкӀала гъамдеш,
Чебаиши кьалли, мискин зяхӀматдеш,
ЧӀямбирухӀели бебкӀала кьутӀкьудеш,
ЛайвакӀибси джагьаннабла буцӀардеш,
СецадхӀи сабур биркьида цӀализиб?

Агарли дунъя ахӀинил уркӀилизиб,
Урехи агарли ца Аллагьлизиб,
Гьав ахӀи агарли хӀела чархлизиб,
СецадхӀи сабур биркьида цӀализиб?

Гьанбиркулив, абдал, хӀебкӀусра или,
ВехӀизурли, хӀярамси хӀуни хӀеили,
ХӀялалси, хӀярамси хӀуни хӀеили,
СецадхӀи сабур биркьида цӀализиб?

Мусни-дзубрала урґала хӀед хӀеґес,
Ґаллира бебкӀаличи цӀакь хӀебиэс,
Се пайда, мискин, гӀямру къагъли кархес,
СецадхӀи сабур биркьида цӀализиб?

Мискин, дунъяли виргӀяли леври,
БебкӀалис хӀядурдеш агарли леври,
ГӀязабтачи хӀекьли карцӀли леври,
СецадхӀи сабур биркьида цӀализиб?

Мискин, тавбаличил гӀямру хӀеркӀули,
МялгӀун илбисличил дунъя беркӀадли,
УбкӀухӀели имайзивад ухъадли,
СецадхӀи сабур биркьида цӀализиб?

Кьасличил леври кьалли гьеч вебкӀхӀевебкӀес,
Халал карцӀи леб кьалли дунъя бихӀес,
Нагагь хӀейъадли мурадличи ваэс,
СецадхӀи сабур биркьида цӀализиб?

ГIяхӀли къайгъибара бебкӀа чарбарес,
Сецад виадлира хӀебкӀили уэс,
Се хӀейъишира, мискин, ярґа ахъес,
СецадхӀи сабур биркьида цӀализиб?

Гьар вайти хӀела уркӀилизир сарли,
ХӀекьти хӀечирад гьарахъли сарли,
Хамха гӀязабберкӀести пишни сарли,
СецадхӀи сабур биркьида цӀализиб?

Или гъапурли керхадли хӀяблизи,
Савгъат чинаба или алли хӀези,
ХӀела някъра мискинни балбикалли,
СецадхӀи сабур биркьида цӀализиб?

ХӀуни Халикьла гӀядлу чебаиши,
Джагьаннабла ца буцӀарли барґиши,
Мискин, чумилра гӀязаб чӀямдариши,
СецадхӀи сабур биркьида цӀализиб?

ЦӀакьичил увухъес ахъри агарли,
Мас бедили верцес дарман агарли,
Рушбатлис улґани кьади агарли,
СецадхӀи сабур биркьида цӀализиб?

Тавбализи керхи гъапурли хӀебкӀес,
МухӀяммад, гьалжан асили вебкӀес,
Нагагь амрубаралли мискин керхес,
СецадхӀи сабур биркьида цӀализиб?