#Rasmiy_munosabat

Ijtimoiy tarmoqlarda Jondor tumanidagi 22-sonli davlat maktabgacha ta’lim tashkilotida tarbiyalanuvchiga nisbatan xodim tomonidan noo‘rin xatti-harakat sodir etilgani yuzasidan e’lon qilingan murojaat bo‘yicha quyidagilarni ma’lum qilamiz.

Tarbiyalanuvchining otasi tomonidan mazkur holat yuzasidan Buxoro viloyati maktabgacha va maktab ta’limi boshqarmasiga murojaat qilingan. Murojaat asosida 2026-yil 24-sentabr kuni boshqarma mas’ullaridan iborat ishchi guruh tomonidan holat o‘rganilgan.

O‘rganish davomida 2026-yil 18-sentabr kuni maktabgacha ta’lim tashkilotining yordamchi tarbiyachisi tomonidan mashg‘ulot jarayonida tarbiyalanuvchining yuziga urilganligi aniqlangan.

Mazkur holat yuzasidan maktabgacha ta’lim tashkiloti direktorining 2026-yil 25-sentabrdagi tegishli buyrug‘i bilan yordamchi tarbiyachiga lavozim vazifalarini lozim darajada bajarmaganligi uchun intizomiy jazo chorasi qo‘llanilgan.

Shuningdek, Jondor tuman sudi tomonidan O‘zbekiston Respublikasi Ma’muriy javobgarlik to‘g‘risidagi kodeksining 52-moddasi ikkinchi qismiga asosan, yordamchi tarbiyachiga nisbatan bazaviy hisoblash miqdorining ikki baravari, ya’ni 880 000 so‘m miqdorida jarima jazosi tayinlangan.

Buxoro viloyati maktabgacha va maktab ta’limi boshqarmasi Axborot xizmati