Айдааннаах-араллааннаах суруйааччылар түмсүүлэрэ дьэ салайааччыларын талбыттар. Саҥа бэрэссэдээтэлинэн Афанасий Гуринов-Арчылан буолбут. Сайа кандидатуратын бэйэтэ устуммут, Доллонов киирсибэтэх.

Афанасий Гуринов-Арчылан, СӨ Суруйааччыларын сойууһун саҥа талыллыбыт бэрэссэдээтэлэ:
– Бастатан туран, эрэлгит иһин махтанабын. Толорор сүбэҕэ 2011 сылтан 2021 сыл ахсынньытыгар диэри үлэлээбитим, ол тухары биир да мунньаҕы көтүппэтэҕим. Ол кэннэ туох быһыы-майгы үөскээбитин бары билэҕит.
Саҥа устаап оҥоруутугар үһүө буолан – СахсаТар, Чуона Мэхээлэ уонна мин үлэлээтибит.
Сүүрбэ сыл устата “Күрүлгэн” сурунаалга ылбыт үөрүйэхпин сойуус сайдыытыгар туһулуом. Арассыыйа түөлбэлэрин, тас дойдулары да кытта үлэни, хардары тылбааһы тэрийии салҕаныаҕа.
Биһиги сойууспут ис кыаҕа олус улахан. Ыкса алтыспыт убай суруйааччыларым Сэмэн Руфов, Рафаэль Баҕатаайыскай, Баһылай Сивцев, Ксенофонт Уткин-Нүһүлгэн, Ньукулай Тобуруокап, Уйбаан Горнай эрэллэрин толорорго дьулуһан, ол ис кыаҕы таһаарарга күүскэ үлэлиэҕим.  

https://kiinkuorat.ru/articles/r-kem-ustata-ba-a-suoh-syryttybyt-s-p-buoluo