Туох даҕаны культура диэн сыстыбатах дьонуттан киһи сонньуйар...

Бүгүн, күннээх күһүҥҥү күнү баттаһа "Poncho Camp” диэн бүлүүлүүр суолга сытар сынньанар сиргэ сырыттыбыт.

Саха сиригэр дьону саататары, сынньатары сатыыр буолан эрэллэр: айылҕа кыраһыабайын ханыылатан араас мас оҥоһуктары, үрэҕи туоруур күргэ, олорон сынньанар, айылҕаны иһийэр, айылҕалыын кэпсэтэр эйгэ бары оҥоһуллубут👍

Бүгүн көрдөххө сүүһүнэн киһи баар, өрүүтүн да маннык буолуо. Буолумуна, эчи үчүгэйэ, Кэнкэмэ үрэх устан күлүмүрдүү сытар.

Ол эрэн, бачча үчүгэйи, дьон дуоһуйуутун 6-7 дьахтар ыста диэн этиэххэ сөп. Кинилэр эрэ баалларын курдук бэлэс хайдарынан күлүү-салыы, солуута суох улаханнык кэпсэтэн куорат тыаһыттан сынньана кэлбит дьону сылаттылар. Муҥ саатар биир сиргэ олорботтор Кэнкэмэ ойуурун тилэри хаама сылдьаллар, муммут да киһини итинник хаһыытаан көрдөөбөттөр, бэйэ бэйэлэрин ыҥырсаллара ыраахтан иһиллэр, саатар ханна сүтэрсэн кээһэллэрэ буолла.

Бастаан утаа ыччаттар, устудьуоннар сылдьаллар дии санаабыппыт, чугаһаабыттарын кэннэ көрбүппүт 50нчалаах дьахталлар эбит🤦🏻‍♂️ Уонна ыччаттар оннуктар-манныктар диэн үчүгэмсийэн бөҕө буолуохтара... Били, этэр "Сунгариларыгар" пятницалаан баран үргүччү тиийбиттэр быһыылаах. Аны, холуочуктар диэҕи, өйдөөхтөр курдук, таҥас-сап мааны.

Манан тугу этиэхпин баҕарабын, дьахтарыттан - эр киһититтэн, эдэриттэн - эмэниттэн тутулуга суох дьон сынньана тиийэр сиригэр арыый сэмэйдик, атын дьоҥҥо мэһэйдээбэт гына сылдьыахха. Дьон сынньалаҥы, уоскуйууну, өйү-санааны сааһылаары итинник сирдэргэ тиийэр, сорохтор харчы төлөөн ыраахтан кэлэллэр.

Сороҕор маннык быһыы рестораҥҥа эмиэ көстөр, аттынааҕы остуолга итинниккэ майгынныыр бэлэс хайдарынан күлэр-салар дьон баар буолааччы. Сатаан туттуммат буоллахха, куорат иһигэр, таһыгар араас сынньалаҥ "хаустар" элбэхтэр.