Бөекләребезнең каберләрен карау – изге бурычыбыз!


Татар халкы матур гадәтләргә бай. Шулардан, үз халкын алга алып барган, милләтен саклау өчен бар көчләрен биргән бөек шәхесләребез, аларның истәлекле урыннарын да саклау. "Азатлык" Татар яшьләре берлеге оешмасы җитәкчесе Наил Нәбиуллинның Истанбулга сәфәре барышында милләтебезнең бөек юлбашчылары Гаяз Исхакый, Йосыф Акчура, Садри Максуди һәм аның тормыш иптәше Камилә ханым каберләрен зиярәт итүе – бу гадәтләрнең күркәм үрнәге.

Гаяз Исхакый – милләтебезнең горурлыгы, татар халкы өчен үз тормышын багышлаган бөек шәхес. Йосыф Акчура – безнең уйлау рәвешебезне үзгәрткән, татар халкын үзбилгеләнүгә рухландырган шәхес. Садри Максуди – милләтебезнең сәяси бәйсезлегенә юл күрсәткән, аның мәнфәгатьләрен халыкара мәйданнарда яклаган беренче Президентыбыз. Аларның һәрберсе үз халкы өчен барысын да биргән һәм әлеге изге каберләр милләтебезнең бөеклеген искә төшереп тора.


Каберләрне чистарту, алар янында дога кылу – тарихи ядкарьләребезне саклауның бер өлеше генә түгел, ә рухи мирасны дәвам итүнең дә чагылышы. Каберләрне тәртиптә тоту – бу шәхесләрнең хезмәтләрен, эшләрен һәм тырышлыкларын бәяләп, аларның исеме белән бәйле милли кыйммәтләрне саклау дигән сүз. Беренчедән, милләтебезнең бөек шәхесләренең каберләре – үзенә күрә бер тарихи ядкарь. Алар буыннарга бөекләребезнең ни дәрәҗәдә кыйммәтле эшләр башкарганын күрсәтә. Икенчедән, милләтнең бөек шәхесләрен танып-белү яшь буын өчен рухи үсеш чыганагы булып тора. Аларның тормышы һәм эшчәнлеге яшьләрне милләт өчен җаваплылык хисе белән тәрбияли. Өченчедән, Каберләргә барып, дога кылу – милләтнең үткән белән бүгенге арасындагы рухи бәйләнешне ныгыта.

Аңларга кирәк, бөекләеребезнең каберләр янына барып дога кылу, аларны тәртиптә тоту – бу гади бер эш кенә түгел, ә милли тәрбия чарасы, халкыбызның үткәненә хөрмәт күрсәтү. Без мондый гамәлләр аша милләтебезнең югалмас рухи байлыкларын саклыйбыз. Каберләр – үткән белән бүгенгене бәйләүче күпер. Ул күпер безнең күңелләрдә тарихи тамырларыбызга хөрмәт уята һәм милли бердәмлекне ныгыта. Өстәвенә, бөекләребезнең каберләрен карау – бүгенге көндә безнең аларга булган бурычыбызны үтәргә омтылыш.

Истанбулга сәяхәт кылучы чын татарлар өчен бу каберләр зиярәт итү өчен мөһим нокталарның берсенә әверелсен иде. Шул каберләрне зиярәт итү – һәрберебез өчен кирәкле гамәл. Каберләр Истанбулның Европа ягында урнашкан. Алар янына барып, дога кылу – милләтебез, халкыбыз өчен эшләнгән изге эшләрдән.

Истанбулга барган һәр татар кешесе бу каберләргә барырга, алар янында дога кылырга тиеш. Бу безнең күңелебездәге бурыч, үткәннәргә хөрмәтебез һәм киләчәк буыннарга калдырган үтемле вәсыятебез.

Каберләрнең адресы:

Гаяз Исхакый һәм Йосыф Акчура каберләре: Әдернәкапы зираты
https://maps.app.goo.gl/LrLrSCZs8E4asHbz5

Садри Максуди һәм аның тормыш иптәше Камилә ханым каберләре Зинҗирликую зиратында урнашкан.
https://maps.app.goo.gl/nZjXTdVJtAsL4mKU7

Истанбулга юл тоткан һәр татарга бу бөек урыннарга барырга һәм үз халкыбызның күркәм шәхесләренә ихлас рәхмәтләрен җиткерергә киңәш итәбез. Бу – үткәннәребезгә тугрылык һәм татарлыгыбызның сакланышын тәэмин итү дигән сүз.