ТАТАР ЯШЬЛӘРЕ ХӘТЕР КӨНЕН ДӨНЬЯ АРЕНАСЫНА ЧЫГАРА

“Азатлык” Татар яшьләре берлеге Хәтер көне уңаеннан,й 1552 ел фаҗигасен искә алып төрле чаралар оештыруны дәвам итә. Татар яшьләре дөньяның төрле почмакларында, төрле илләр һәм шәһәрләрдә, Хәтер көненә багышлап ялгыз пикетлар һәм теләктәшлек акцияләре үтте. Шулай итеп Төркиядә (Анталия, Әнкара, Конья, Истанбул), Грузиядә (Тбилиси), Азәрбәйҗанда (Баку), Төньяк Кореяда, Франциядә (Страсбург), Тайланд, Индонезия һәм Кытайда узды.

“Азатлык” Татар яшьләре берлеге лидеры Наил Нәбиуллин ялгыз пикетны Анталия үзәгендә үткәрде. Ул чиратлашып татар һәм төрек телләрендә бастырган шигарь күтәреп торды. Төрекчәсендә “1552 ел. Казан. Төрки дөнья! Онытма! Оныттырма!”, - дип язылган иде. Татар яшьләре лидеры акциясе төрекләр арасында зур кызыксыну уятты, алар күп итеп теләктәшлек күрсәтте.

“Татарстанда тыелган вакытта да Хәтер көнен чит илләрдә яшәтәчәкбез. Бу эштә һич бер көчебезне дә кызганмачакбыз. Быел 8 илдә Хәтер көне акцияләре үткәрә алдык. Алга таба Хәтер көнен үткәрәчәк илләр һәм шәһәрләр санын арттыру өстендә тагын да зур эш алып барачакбыз. Хәтер көнен тыюларга һәм дога кылу җыеннарын көч кулланып куып таратуларга без тагын да зуррак эшчәнлек, һәм Хәтер көне географиясен бөтен дөньяга киңәйтү белән җавап бирәчәкбез. Килер бер көн, без Казаныбызда да Хәтер көнен зурлап үткәрәчәкбез!”, – дип белдерде Наил Нәбиуллин.