Татар латиницасында язылган хатны да урнаштырабыз. Үрнәк булсын башкаларга.
Размещаем и само обращение на татарской латинице. Пусть оно станет примером.

Tatarstan Respublikası Prezidentı
Röstäm Nurğali ulı Miñnexanovqa
Tatar milli xäräkäte oyışması
“Azatlıq” Tatar yäşläre berlegennän

Möräcäğät

Xörmätle Röstäm Nurğali ulı.

31 may könne tanılğan jurnalist, produsser, yazuçı, publitsist, bik küp cırlar avtorı İlfaq Şihapovnıñ vafatına cide yıl bulaçaq. Anıñ ğömere 2017nçe yılda özelgän ide...

Leninoğork rayonınıñ İske İşteräk avılında tuğan İlfaq Şihapov millätebez häm Cömhüriätebez öçen bik möhim şäxes. Ul başqalardan ixlaslığı, härwaqıt döreslek ezlärgä tırışuı belän ayırılıp tordı. Talantı, uyları, zur ideyäları belän bu dönyanı üzgärtergä teläde, millätebez häm xalqıbız öçen yanıp-köyep yäşäde. İlfaq Şihapov başqalar kürmägän, däşmägän häm äytergä qurıqqan närsälär turında söyläde, qatlaulı mäs’älälärne kütärergä tırıştı. Qısqa ğına ğömere vaqıtında 20 al’bom häm 350 cır, distälägän kitaplar, fil’mnar, ğazetalar çığardı... İlfaq Şihapov tatar jurnalistikasına da zur öleşen kertte, sotsial’ soraularnı kütärde. Anıñ qulı timägän ölkä yuqtır... mädäniät, muzıqa, kino, tarix, ädäbiät, jurnalistika h.b. Tatar tarixın öyränügä dä İlfaq Şihapov zur öleşen kertte, avıl tarixları buyınça xezmätlär çığardı.
Ni qızğanıç, İlfaq Şihapovnıñ bik küp cırları cırlanmıy qaldı... Tik şulay da, anıñ başqarğan eşläre – millätebez häm Cömhüriätebez aldında bäyäläp betergesez. Bez isä İlfaq Şihapovnıñ mirasın saqlap, bu şäxeskä qarata tirän ixtiram bularaq, anı härwaqıt xäterläp, iskä alıp yäşärgä tiyeş. Monıñ öçen isemen mäñgeläşterügä qayber adımnar başqarası ide.

Xörmätle Prezidentıbız! Tatarstanda, ayıruça Qazan häm Leninoğork rayonında İlfaq Şihapovnıñ isemen mäñgeläşterü eşlären başlap cibärergä ämer birüyegezne sorıybız. Anıñ isemen Qazan häm Leninoğorsk şähärläreneñ uramnarına birüyegezne sorıybız. Şulay uq İlfaq Şihapov isemen muzıqa mäktäbenä, yaki ğomumi mäktäpkä dä birsäk äybät bulır ide. Monnan tış, İlfaq Şihapov yäşägän, yaki eşlägän binalarğa istälek taqtaların quyu, yel sayın Respublika häm rayon däräcäsendä anıñ tuğan könendä qontsert yaki başqa mädäni, iskä alu çaraları oyıştıru döres bulır ide. Qazanda İlfaq Şihapov yäşägän yortta hiçşiksez elmä taqta quyu, anı tantanalı räveştä açu bik döres bulır ide. Şulay uq İlfaq Şihapov äsärlären säxnäläşterü, anıñ ruxi vä mädäni mirasın tanıtu, millätebezgä iskä töşerü maqsatınnan televideniye häm matbuğat çaraları aşa xalqıbızğa citkerü döres bulır ide.

İlfaq Şihapovnıñ isemen mäñgeläşterü mäs’älälären uñay xäl itärsez, dip ömetlänäbez! Bu İlfaq Şihapovnıñ xezmätlären bäyäläu belän bergä, böten tatar dönyası öçen bik möhim. İlfaq Şihapov icatında millät ruxı bar. Ğorurlıq bar. Tatarğa mäxäbbät bar.

İlfaq Şihapovnı onıtmadıq häm onıtmayaçaqbız!

Xörmät belän, “Azatlıq” Tatar yäşläre berlege räise
Nail Änäs ulı Näbiullin.
14.05.2024 yıl.

Азатлык