ИСКЕШӘҺӘРДӘ ЗУРЛАП ТАТАР ИФТАРЫ ОЕШТЫРЫЛДЫ

24 март көнендә Төркиянең Искешәһәр исемле шәһәрендә зурлап Татар ифтары оештырылды. Җыен Төрки дөнья өчен бик мөһим булган, һәм Акчура, Максуди, Исхакыйлар оештырган Төрки учаклар оешмасы бинасында үтте. Татар ифтарында 100 ләп кеше катнашты.

Татарларга теләктәшлек күрсәтү максатыннан җыенга кардәш халыклардан Кырым Татарлары, үзбәкләр, казахлар да килгән иде. Искешәһәрдәге Татар ифтарына милләттәшләрбез махсус татар милли ризыкларын әзерләгән иде.

Истанбул һәм Әнкарадагы Татар ифтарларының дәвамы булган әлеге авыз ачу, шулай ук Дәрдемәнднең 165, Мөхлисә Бубыйның 155, Гаяз Исхакый вафатының 70 еллыгына багышланды, берничә ай элек фаҗигале рәвештә вафат булган, "Азатлык" Татар яшьләре берлеге активисты Батырхан Әгъзамов рухына багышланды.

Җыенда Равил хәзрәт Татарларның бердәмлегенә һәм динебезнең көченә багышланган вәгазь сөйләде. Наил Нәбиуллин исә, Дәрдемәнднең һәм Мөхлисә Бубыйның юбилейлары, аларның милләтебез өчен эшчәнлекләре, Гаяз Исхакый вафатының 70 еллыгы, бөек юлбашчыбызның хезмәтләре, яшь егет Батырханның Татарларның азатлыгы көрәшүе турында сөйләде, милләттәшләребезне бердәмлеккә чакырды.

Җыенда катнашучыларны тәмле пылау, татар милли ризыклары һәм сөтле чәй белән сыйладылар, һәр катнашучыга Татар байракларын бүләк иттеләр.