ӘНКАРАДА ТАТАР ИФТАРЫНДА ИСХАКЫЙ КИТАПХАНӘСЕ АЧЫЛДЫ

23 мартта, Төркия башкаласы Әнкарада зур итеп Татар ифтары үткәрелде. Җыенда 50гә якын милләттәшебез катнашты.

Кичәне оештыручылар бөек шәхесләребез Дәрдемәнд, Мөхлисә Бубый һәм Гаяз Исхакый турында сөйләде. Оештыручылар әлеге очрашу Татарларны берләштерү өчен үткәрелүен сөйләде.

“Татар халкына бердәмлек җитми. Аеруча чит илләрдә яшәүче милләттәшләребез менә мондый очрашуларга, җыеннарга сусаган. Бергәләшеп җыелып, туган телебездә аралашып, авыз ачып, без танышабыз, бердәмлегебезне ныгытабыз” – дип сөйләде җыенны оештыручыларның берсе Наил Нәбиуллин.

Әнкарада Татар ифтары вакытында тантаналы рәвештә Гаяз Исхакый исемендәге Татар китапханәсе ачылды, анда әлегә 50 китап җыелган. Бу китапханә Татарларны берләштерү һәм очраштыру ноктасы, булыр дип ышана ифтарны оештыручылар.

“Әнкарада Татар ифтарын икенче ел рәттән оештырабыз. Быелгының тагын бер үзенчәлеге, авыз ачу мәҗлесе Төркия башкаласының нәкъ үзәгендә үтә. Бу бик мөһим” – дип сөйләде оештыручылар.