ТАТАР АКТИВИСТЛАРЫ “МИН ТАТАРЧА СӨЙЛӘШӘМ” АКЦИЯСЕН КҮЧЕРҮГӘ КАРАТА РИЗАСЫЗЛЫГЫН БЕЛДЕРДЕ

Ел саен 26 апрельдә, Казанның Бауман урамында үткәрелә торган “Мин татарча сөйләшәм” акциясен цирк бинасы каршындагы мәйданга күчерүләре билгеле булды. “Азатлык” Татар яшьләре берлеге моңа ризасызлык белдереп, Татарстан Мәдәнияте министры Ирада Аюповага мөрәҗәгать юллады.

Берлек рәисе Наил Нәбиуллии имзалаган хатта, Татар яшьләре “Мин татарча сөйләшәм” акциясен цирк янына күчерү карарына кискен ризасызлыгын белдерә диелә. "Цирк мәйданына күчерү татар теленнән көлү буларак күренә, аңа чын мөнәсәбәт күрсәткече булып тора. Ягъни, татар теле һәм аның белән бәйле чаралар шулкадәр “мөһим түгел” ки, цирк янына да җибәрсәк була кебек. Татар теле урыны циркта гына сыман кабул ителә. Моның белән киң җәмәгатьчелек алдында татар теленең дәрәҗәсе төшерелә, аның кирәксез икәнлеге искәртелә. Читтән шулай күренә. “Мин татарча сөйләшәм” акциясен шәһәр үзәгеннән цирк янына җибәрү Татар халкына карата хөрмәтсезлек күрсәтү дә!” – дип белдерә Татар яшьләре.

Татар активистлары фикеренчә, “Мин татарча сөйләшәм” акциясен цирк янына җибәрү татар халкын, татар телен кимсетү буларак бәяләнергә, милләтебезнең күңелдә тискәре хисләр, үпкәләү хисе барлыкка китерергә мөмкин. Үз мөрәҗәгатендә, “Азатлык” яшьләре “Мин татарча сөйләшәм” акциясен цирк янына җибәрмәскә, элеккеге һәм традицион рәвештә үткәрелә торган Бауман урамына кайтарырга чакыра.