ካብ ቢሮ ጉዳያት ኮምኒኬሽን ትግራይ

ቃልስና ንብሄራዊ ህልውና እዩ!

ከም ህዝብን መንግስትን ትግራይ ካብ ገፅ ምድሪ ከጥፍአና ምስ ዝህንደድ ዘሎ ጀኖሳይደር ስርዓት ኢና ገጢምና ዝንሄና። ከም ህዝቢ ከይንበርስ ዓርስና ንከላኸል ኣለና። ካልኦት ኣሕዋት ህዝብታትን ናይ ምሕዝነት ሓይሊታትን እውን ብተመሳሳሊ ናይ ህልውና ሓደጋ ገጢሙዎም ህልውናኦም ንምውሓስ ምስ ህዝብን መንግስትን ትግራይ ምሕዝነት ፈጢሮም ሓቢሮም ይቃለሱ ኣለዉ።

በዙይ መሰረት ድማ ሰራዊት ትግራይ ይኹን ሓይሊታት ምሕዝነት ብኹሉ ኣንፈት ኣብ ዘተኣማምን ብርኪ ኣለዉ። ብዝተለሙዎ ትልሚውን ኣብ ልዕሊ ፀላኢ ዘተኣማምን ውቅዒት የዕርፉ ኣለዉ። ንዘላቒ ዓወትን ኩናት ብዘተኣማምን ደረጃ ንምዝዛምን ዘኽእሉ መሰረታዊ ስራሕቲ ይስርሑ ኣለዉ። ስለዝኾነውን ዝርዝር ወታደራዊ ዓወታትን ኩነታትን ብዝምልከቶም ኣካላት ብቐፃሊ እናተገለፀ ክኸይድ እዩ።

ብዝተኣሳሰረ ድማ ህዝቢ ትግራይን ኣሕዋት ህዝብታትን ካብ ናይ ዓንፃ ዓንፆን ዓይኒ ዕሙተይን ናይ ኣየር፣ ድሮንን ካልኦትን ደብዳባት ፀላኢ ዓርስኹም እናተኸላኸልኩም ቃልሲ ንብሄራዊ ህልውናና ናብ ሙሉእ ዓወት ንምብፃህ ኣብ ዝግበር ዘሎ ርብርብ ኩለ መዳይ ቃልስኹምን ድጋፍኩምን ክትቅፅሉሉ ይግባእ። ጅግና ተቓላሳይ ድያስፖራናውን ቃልስና ቀልጢፉ ንኽዛዘምን ህልውናና ብሙሉእነት ንኽረጋገፅን ከም ቀደምኩም ቃልስኹም ክተሐይሉ ይግባእ።

ካብዙይ ብተወሳኺ ፀላኢ ኣብ ባይታ ዝገጥሞ ዘሎ መስተንክራዊ ስዕረትን ህልቂትን ንምሽፋን ብስሩዓት ሚድያታቱን ናይ ማሕበራዊ ሚድያ ነጠፍቱን ብዝውዝዖ ዘሎ ኣብ ባይታ ዘየለ መደናገሪ ወረታት ከይተደናገርና ኣብ ጅግና ሰራዊትናን ሓይሊታት ምሕዝነትን ብምትእምማን ኩላትና በቢ ዘለናዮ ቃልስና ነሐይል።

ኣብ መወዳእታ ኣጋጢሙ ንዝነበረ ናይ ሓበሬታ ምቁርራፃት ይቕረታ እናሓተትና ብቐፃሊ ግን ብዝኸኣልናዮ ብስሩዓት ሚድያታትናን ካልኦት መማረፂታትናን ንህዝብና ዘድልዩ ሓበሬታታት ኮኑ መግለፂታት ከይተቖራረፁ ንኽውሕዙ ዝከኣለና ኹሉ ክንገብር ኢና።

ዘበት ንብሄራዊ ብርሰት!
ቢሮ ጉዳያት ኮምኒኬሽን ትግራይ
19 መስከረም 2019
መቐለ

@AscenTig